Massive support for Nara Bhuvaneswari నారా భువనేశ్వరికి మేం అండగా ఉంటాం..! రాజమండ్రిలో కలసి సంఘీభావం తెలుపుతున్న నేతలు, ప్రముఖులు

Massive support for Nara Bhuvaneswari చంద్రబాబు అరెస్ట్​ను ఖండిస్తూ వివిధ రంగాలకు చెందిన ప్రముఖులు, వివిద పార్టీల నేతలు రాజమహేంద్రవరం చేరుకుంటున్నారు. నారా భువనేశ్వరీకి మేం అండగా ఉంటామంటూ.. ప్రకటిస్తున్నారు. చట్టాన్ని ఉల్లంఘించి.. చంద్రబాబును అరెస్టు చేశారని వారు మండిపడ్డారు. నేడు తెలంగాణ నేతలతో పాటు తెలుగు రాష్ట్రాలకు చెందిన ప్రముఖ వైద్యులు, ఏపీకి చెందిన నేతలు.. భువనేశ్వరీని కలసి సంఘీభావం తెలిపారు.

Massive support for Nara Bhuvaneswari తెలుగుదేశం అధినేత నారా చంద్రబాబు అరెస్ట్ చేసి రాజమండ్రి సెంట్రల్ జైల్​కు తరలించిన నేపథ్యంలో... గత కొద్ది రోజులుగా నారా నారా భువనేశ్వరి సైతం రాజమండ్రిలోనే ఉంటున్నారు. ఈ నేపథ్యంలో ఆమెను కలిసి సంఘీభావం తెలిపేందుకు పలువురు ప్రముఖులు, రాజకీయ నేతలు రాజమండ్రికి తరలివస్తున్నారు. నేడు ఉమ్మడి తూగో జిల్లా జనసేన అధ్యక్షులు కందుల దుర్గేష్, జనసేన నేతలు నారా భువనేశ్వరిని కలిసి పరామర్శించారు. పవన్ కల్యాణ్ ఆదేశాల మేరకు జనసేన శ్రేణులు తెలుగుదేశం కార్యక్రమాలకు ప్రతీ చోట మద్దతు తెలుపుతున్నాయని కందుల దుర్గేష్ తెలిపారు. భువనేశ్వరి ఎంతో ధైర్యంగా ఉన్నారని వెల్లడించారు. వైసీపీకి ప్రజలు ఇచ్చిన అవకాశం అయిపోయినందున ఇక ఇంటికి వెళ్ళటమే మిగిలిందని పేర్కొన్నారు.

రాజమండ్రిలో నారా భువనేశ్వరి, బ్రాహ్మణి లను తెలంగాణ రాజకీయ నేతలు పరామర్శించారు. ఉమ్మడి రాష్ట్ర మాజీమంత్రి మండవ వెంకటేశ్వరరావు, కాంగ్రెస్ నేత అరికెళ్ల నర్సారెడ్డి పరామర్శించిన వారిలో ఉన్నారు. చట్టాన్ని ఉల్లంఘించి చంద్రబాబు ని అరెస్టు చేశారని మండవ వెంకటేశ్వరరావు అన్నారు. చంద్రబాబు కేసులో ఏ ఆధారం లేకుండా హైదరాబాద్, దిల్లీలో సీఐడీ విషప్రచారం చేస్తోందని ఆగ్రహం వ్యక్తం చేశారు. దోచుకుని దాచుకునే వాడు దొరలా, పంచి పాలన అందించేవాడు నిందితుడిలా జైల్లో ఉండటం దుర్మార్గమన్నారు. చంద్రబాబు తప్పు చేశారని నమ్మే పరిస్థితిల్లో ఎవ్వరూ లేరన్నారు. చంద్రబాబుపై పెట్టిన కేసుని చూస్తే దేశంలో ఉన్న రాజకీయ నేతలంతా జైల్లోనే ఉండాలని తెలంగాణ కాంగ్రెస్ నేత అరికెళ్ల నర్సారెడ్డి అన్నారు. నియంత పోకడలతో చంద్రబాబు ని అరెస్టు చేశారు తప్ప కేసులో ఎలాంటి నిజాయితీ లేదని వెల్లడించారు.

చంద్రబాబు అరెస్టు పట్ల ప్రముఖ వైద్యనిపుణులు తీవ్ర ఆవేదన వ్యక్తంచేశారు. రాష్ట్రానికి, దేశానికి చంద్రబాబు లాంటి సమర్థ నాయకుడి అవసరం చాలా ఉందన్నారు.రాజమండ్రి లోనారా భువనేశ్వరి, బ్రాహ్మణిలను ప్రముఖ హృద్రోగ వైద్యులు సోమరాజు, ఆర్థో సర్జన్ బీఎన్ ప్రసాద్, మాజీమంత్రి కామినేని శ్రీనివాస్​లు పరామర్శించారు. చంద్రబాబు అరెస్టు ఎంతో కలిచి వేస్తోందని సోమరాజు అన్నారు. దేశ విదేశాల్లో ఆయన అరెస్టును ఖండిస్తూ ప్రజలు రోడ్డెక్కుతున్నారంటేనే చంద్రబాబు ఏ తప్పు చేయరనే నమ్మకం ప్రజల్లో ఉందన్నది తెలుస్తోందన్నారు. స్కిల్ డెవలప్మెంట్ లో ఎలాంటి అవినీతి లేదన్నదినాడు క్యాబినెట్ లో ఉన్న మంత్రిగా తాను చెప్తున్నా అని మాజీమంత్రి కామినేని శ్రీనివాస్ తెలిపారు. బీజేపీ నేతగా కాకుండా వ్యక్తిగతంగా చంద్రబాబు కుటుంబ సభ్యుల్ని పరామర్శించటానికి వచ్చా అని స్పష్టం చేశారు. చంద్రబాబు ను అరెస్టు చేసిన తీరు దుర్మార్గమని మండిపడ్డారు.