Jungle Cat Died: రోడ్డు ప్రమాదంలో అడవి పిల్లి మృతి

వాహనాలు ఢీకొట్టడంతో..అరుదైన జంతువులు చనిపోతున్నాయి. తాజాగా రోడ్డు ప్రమాదంలో అడవి పిల్లి మృతి చెందిన ఘటన తూర్పుగోదావరి జిల్లా తాళ్లరేవు మండలం కోరంగి గ్రామంలో చోటుచేసుకుంది.

ఈ చిత్రంలో ఉన్నది పులి అనుకుంటే మీరు పొరబడినట్లే..! ఎందుకంటే ఇది పులిలాగా కనిపించే అడవి పిల్లి. అనుకోకుండా రోడ్డు ప్రమాదంలో మృతి చెందింది.

వివరాల్లోకి వెళితే..

తూర్పుగోదావరి జిల్లా తాళ్ల రేవు మండలం కోరంగి గ్రామానికి సమీపంలో అడవులు విస్తరించి ఉన్నాయి. అందులో నివసించే ఏటి పిల్లులు, నక్కలు, నీటి కుక్కలు రాత్రి సమయంలో రోడ్డుపైకి వచ్చి సంచరిస్తూ ఉంటాయి. ఆ సమయంలో వాటిని చూసి భయంతో ప్రయాణికులు వాహనాలతో ఢీకొట్టడం లేదా తప్పించుకునే క్రమంలో వాహనాలు మీద నుంచి కిందపడిన ఘటనలు గతంలో అనేకం జరిగాయి.

పులి ఆకారంలో ఉన్న పిల్లిని గుర్తుతెలియని వాహనం ఢీకొట్టడంతో...తీవ్ర గాయాలపాలై చనిపోయింది. తెల్లవారుజామున అటుగా వెళుతున్న వాహనదారులు పులిగా భావించి ఫోటోలను సామాజిక మాధ్యమాల్లో పోస్టు చేశారు. ఈ విషయమై నిర్ధరణ కొరకు అటవీశాఖ అధికారులను...పోలీసులు సంప్రదించగా తమకు ఎటువంటి సమాచారం అందలేదని వారు జవాబిచ్చారు.

ఇదీ చదవండి: