ఎమ్మెల్యే ద్వారంపూడి వ్యాఖ్యలపై జనసేన నేతల నిరసనలు

తూర్పుగోదావరి జిల్లా కాకినాడ ఎమ్మెల్యే ద్వారంపూడి చంద్రశేఖర్ రెడ్డి చేసిన వ్యాఖ్యలను ఖండిస్తూ... జనసేన నేతలు, నాయకులు ఆందోళనలు చేపట్టారు. వెంటనే తమ నాయకునికి క్షమాపణ చెప్పాలని డిమాండ్ చేశారు.

తూర్పుగోదావరి జిల్లా కాకినాడ ఎమ్మెల్యే ద్వారంపూడి చంద్రశేఖర్ రెడ్డి... తెదేపా అధినేత చంద్రబాబు, జనసేన అధినేత పవన్ కళ్యాణ్​పై అసభ్యకర వ్యాఖ్యలు చేయడాన్ని జనసేన నేతలు తీవ్రంగా ఖండించారు. జిల్లాలోని భానుగుడి కూడలిలో ఎమ్మెల్యే నివాసాన్ని ముట్టడించేందుకు జనసేన నాయకులు ప్రయత్నించారు. విషయం తెలుసుకున్న పోలీసులు ఎలాంటి ఘటనలు జరగకుండా ఎమ్మెల్యే ఇంటి పరిసరాల్లో భారీగా మోహరించారు.

వయసుకైనా గౌరవం ఇవ్వరా:పాముల రాజేశ్వరి
వయసుకైనా గౌరవం ఇవ్వకుండా... సమాజం తలదించుకునేలా ఎమ్మెల్యే వ్యాఖ్యలు చేయడం అత్యంత బాధాకరమని, మాజీ ఎమ్మెల్యే పాముల రాజేశ్వరి అన్నారు. స్థానిక ఎన్నికల్లో వైకాపాకు బుద్ధి చెప్పాలని ఆమె పిలుపునిచ్చారు.

క్షమాపణ చెప్పాలి: పంతం నానాజీ
ఎమ్మెల్యే వ్యాఖ్యలపై జనసేన పార్టీ పొలిటికల్ ఎఫైర్స్ కమిటీ సభ్యులు పంతం నానాజీ మండిపడ్డారు. తక్షణమే క్షమాపణ చెప్పాలని డిమాండ్ చేశారు. లేనిపక్షంలో ఉద్యమం తీవ్రతరం చేస్తామని హెచ్చరించారు. వెంటనే ఎమ్మెల్యేను పోలీసులు అరెస్టు చేయాలని డిమాండ్ చేశారు.

ఇదీ చదవండి: ఎమ్మెల్యే ద్వారంపూడి వ్యాఖ్యలపై భగ్గుమన్న తెదేపా, జనసేన