రాజమహేంద్రవరంలో అడుగడుగునా పోలీసుల ఆంక్షలు కొనసాగుతున్నాయి. జనసేన అధినేత పవన్కల్యాణ్ పర్యటన నేపథ్యంలో పోలీసులు రంగంలోకి దిగారు. పవన్ పర్యటనకు, జనసేన సభకు ఆంక్షలు లేవన్న పోలీసులు.. శ్రమదానానికి మాత్రం అనుమతి లేదని తెలిపారు. ఎక్కడికక్కడ బారికేడ్లు ఏర్పాటు చేశారు. పవన్‌కల్యాణ్‌తో రెండు వాహనాలనే పోలీసులు అనుమతించారు. మిగతా వాహనాలను ఎయిర్‌పోర్టులోనే నిలిపివేశారు. దీంతో పలువురు ప్రయాణికులు ఇబ్బందులు పడ్డారు.. పవన్ వెంట వెళ్లేందుకు అనుమతించలేదని పోలీసులతో జనసేన శ్రేణుల వాగ్వాదానికి దిగారు. ప్రభుత్వానికి, పోలీసులకు వ్యతిరేకంగా నినాదాలు చేశారు. పవన్ వెంట వస్తున్న వాహనాలను అడ్డుకోవడంపై క్వారీ సెంటర్‌లో పోలీసుల తీరుపై పవన్ ఆగ్రహం వ్యక్తం చేశారు.
రాష్ట్రంలోని రెండు జిల్లాల్లో పవన్ కల్యాణ్ శ్రమదానం చేపట్టనున్నారు. ఇందులో భాగంగా ఆయన తూర్పుగోదావరి జిల్లాలోని రాజమహేంద్రవరం విమానాశ్రయానికి చేరుకున్నారు. ఎయిర్‌పోర్టులో పవన్‌కు జనసేన శ్రేణులు ఘనంగా స్వాగతం పలికారు. రాష్ట్రంలోని రహదారుల దుస్థితిపై నిరసనలో భాగంగా జనసేన ఈ కార్యక్రమానికి పిలుపునిచ్చిన విషయం తెలిసిందే. అందులో భాగంగా ఇవాళ తూర్పు గోదావరి జిల్లా ధవళేశ్వరం బ్యారేజీ రహదారిపై పవన్ శ్రమదానం చేయాలని నిర్ణయించారు. కాగా, భద్రతా కారణాలతో జలవనరుల శాఖ అధికారులు కార్యక్రమానికి అనుమతి నిరాకరించారు. అధికారుల సూచనతో హుకుంపేట రోడ్డుకు కార్యక్రమాన్ని మార్చారు.
మరోవైపు పవన్ పర్యటన నేపథ్యంలో పోలీసులు రాజమహేంద్రవరానికి వెళ్లే మార్గాల్లో చెక్‌పోస్టులు ఏర్పాటు చేశారు. పవన్ అభిమానులను ఎక్కడికక్కడ ముందస్తుగా అదుపులోకి తీసుకుంటున్నారు. పవన్ సభ నిర్వహించనున్న బాలాజీపేటకు ఇరువైపుల 5 కిలోమీటర్ల పరిధిలో పోలీసులు ఆంక్షలు విధించారు. కాగా, బాలాజీపేట పరిసరాల్లో ఎలాంటి ఆంక్షలు లేవని తూర్పు గోదావరి జిల్లా ఏఎస్పీ లలితకుమారి తెలిపారు. పవన్ కల్యాణ్ సభకు ఎలాంటి ఆటంకాలు ఉండవని చెప్పారు.