రూ.90లక్షలిస్తే కోటి ఇస్తామంటూ మోసం..ముఠా అరెస్ట్

మరోసారి పెద్ద నోట్ల రద్దంటూ.. మోసానికి తెరతీసింది ఆ ముఠా. తమ దగ్గర డబ్బు లేక పోయినా..సొమ్ము కాజేసే ప్రయత్నం చేశారు. నోట్ల మార్పిడిపై అనుమానం వచ్చిన అతను పోలీసులను ఆశ్రయించడంతో అసలు కథ బయటపడింది. ఇది ఎక్కడ జరిగిందో తెలుసుకోవాలంటే...చదవాల్సిందే మరి...!!

కాకినాడ గ్రామీణంలోని వలకపాకలకు చెందిన నాగప్రసాద్​కు కరణంగారి జంక్షన్‌కు చెందిన సుబ్రమణ్యం అనే వ్యక్తితో పరిచయం ఏర్పడింది. మాటల్లో స్నేహితుల ద్వారా తనకొక వీడియో వచ్చిందని నాగప్రసాద్​కు సుబ్రమణ్యం చూపించాడు. కంటి నిండా కరెన్సీ కట్టలు కనిపించాయి అందులో…అంతే ఆశగా వీడియో వివరాల గురించి అడిగాడు నాగరాజు.

ఆ ఏం లేదు…నాకు తెలిసిన ఓ ముఠా విశాఖలో నోట్ల మార్పిడి చేస్తోంది. వారి వద్ద 200 కోట్ల రూపాయలు 2వేల నోట్ల కట్టలు ఉన్నాయట..మనం కొంత మొత్తంలో రూ.500 నోట్లు ఇస్తే, దానికి కొంత కమీషన్ కలిపి మనకి 2వేల నోట్లు ఇస్తారట…సులభంగా డబ్బు సంపాదించవచ్చు..బాగుంది కదూ కమీషన్ బిజినెస్ అంటూ సుబ్రమణ్యం నాగప్రసాద్​కు వివరించాడు. నాగప్రసాద్​కు కూడా ఇదేదో బాగుందే అనిపించింది. ముఠా వివరాలు తెలుకుని వెంటనే విశాఖకు బయలుదేరి వారిని కలిశాడు. వచ్చిన పనేంటో చెప్పాడు.

సుబ్రమణ్యం వీడియోలో చూపించింది…చెప్పింది నిజమేనని..కేంద్రం 2వేల నోట్లు రద్దు చేస్తుందని అందుకే తాము ఇలా ఇస్తున్నామని ఆ దుండగులు నాగప్రసాద్​ని నమ్మించారు. 90లక్షల రూపాయల విలువ చేసే 500 రూపాయల నోట్లు తెచ్చి ఇస్తే.. 10 లక్షలు కలిపి మొత్తం కోటి రూపాయల విలువ చేసే 2వేల నోట్లు ఇస్తామని హామీ కూడా ఇచ్చారు. ముందు సరే అన్నా…నోట్ల రద్దు అనేసరికి నాగప్రసాద్​కు అనుమానం వచ్చింది. వెంటనే కాకినాడ సర్పవరం పోలీసులను ఆశ్రయించి విషయం మొత్తం వివరించాడు. రంగంలోకి దిగిన రక్షకభటులు మాటువేసి ఆ మోసకారి ముఠాను అదుపులోకి తీసుకున్నారు. ముఠా వద్ద రూ.2వేల నోట్ల నిల్వలు లేకపోయినా మాయమాటలతో నమ్మించి డబ్బు కాజేసే ప్రయత్నం చేశారని సీఐ గోవిందరాజు వివరించారు.

ఇవీ చదవండి: 414 కిలోల గంజాయి స్వాధీనం...ఇద్దరు నిందితులు అరెస్టు