కరోనా పాజిటివ్‌ యాక్టివ్ కేసుల విషయంలో మరింత నిశిత పరిశీలన అవసరం. అత్యవసరమనే పిలుపు వచ్చిన కేసులను 108, ఆర్‌బీఎస్‌కే అంబులెన్సుల్లో.. కోలుకున్న వారిని తరలించడానికి బస్సులనూ వినియోగిస్తున్నారు. ఇందుకు తూర్పుగోదావరి జిల్లాలో 64 వాహనాలు అందుబాటులో ఉన్నా కేసుల తీవ్రత నేపథ్యంలో వీటి సంఖ్య మరింతగా పెంచాల్సిన అవసరం ఉంది. కొందరు అవగాహన లేమితో అనారోగ్యంగా ఉన్నా గోప్యంగా ఉంచడం, నిర్లక్ష్యం చేసి విషమించాక అత్యవసర సేవలను ఆశ్రయిస్తున్నారు. కొవిడ్‌ నిర్ధారణ అయితే తప్ప ఆయా వాహనాల్లో ఆసుపత్రులకు తరలించే పరిస్థితి లేదు. దీంతో కాలయాపన కొందరి ప్రాణాలను హరిస్తోంది.
అందుబాటులో వనరులు...
అత్యవసర కేసులకు ప్రభుత్వ, ప్రైవేటు వైద్యశాలల్లో సేవలు అందిస్తున్నారు. వయసు మీరిన, ప్రమాదకర కేసులను విశాఖలోని విమ్స్‌కు తరలిస్తున్నారు. మిగిలిన బాధితులకు రాజానగరం పరిధిలోని జీఎస్‌ఎల్‌, రాజమహేంద్రవరం జిల్లా ఆసుపత్రి, కిమ్స్‌ బొల్లినేని, అమలాపురంలోని కిమ్స్‌, కాకినాడలోని ప్రభుత్వ సామాన్య ఆసుపత్రి (జీజీహెచ్‌), హోప్‌ ఆసుపత్రుల్లో సేవలు అందిస్తున్నారు. ఇంట్లో వసతులు లేక హోమ్‌ ఐసోలేషన్‌ పొందలేని పాజిటివ్‌ కేసులను బొమ్మూరు, బోడసకుర్రులో కొవిడ్‌ కేర్‌ సెంటర్లకు (సీసీసీ) తరలిస్తున్నారు. ప్రస్తుత ఆసుపత్రులు, సీసీసీల్లో 10,502 పడకలు అందుబాటులో ఉంచారు. సాధారణ, ఐసీయూ, నాన్‌ ఐసీయూ ఆక్సిజన్‌ పడకలు ఉన్నాయి.
శరవేగంగా వసతులు...
ఐదు డివిజన్లలో కొత్తగా కొవిడ్‌ కేర్‌ సెంటర్ల ఏర్పాటుకు చర్యలు చేపట్టారు. ఇవన్నీ రెండు నుంచి ఐదు రోజుల్లో అందుబాటులోకి రానున్నాయి. ఎటపాక డివిజన్‌లోని చింతూరు, వీఆర్‌పురం, కూనవరం మండలాల్లో 150 చొప్పున పడకలతో కొత్తగా కొవిడ్‌ కేర్‌ సెంటర్లు ఏర్పాటు చేస్తున్నారు. రంపచోడవరంలో 1,000, కాకినాడ జేఎన్‌టీయూలో 1,500.. సామర్లకోట, పెద్దాపురం టిడ్కో సముదాయాల్లో 1,000 పడకల చొప్పున సీసీసీలు ఏర్పాటు కానున్నాయి. రామచంద్రపురంలోని ఆదివారపుపేటలో 300, విజయ ఫంక్షన్‌ హాలులో 100, మండపేట టిడ్కోలో 500 పడకలతో కొవిడ్‌ కేర్‌ సెంటర్లు ఏర్పాటుచేస్తున్నారు.