Bulk Drug Park: రాష్ట్రానికి బల్క్ డ్రగ్ పార్కును కేటాయిస్తూ కేంద్ర ప్రభుత్వం అమోదం తెలిపింది. తూర్పుగోదావరి జిల్లా కేపీపురం వద్ద ఈ పార్కును నిర్మించడానికి అనుమతి ఇస్తున్నట్టు సీఎస్ సమీర్ శర్మకు కేంద్ర ఔషధ మంత్రిత్వశాఖ జాయింట్ సెక్రటరీ ఎన్.యువరాజ్ లేఖ రాశారు. లేఖ అందిన వారం రోజుల్లోగా ప్రాజెక్టు ఏర్పాటు కోసం అంగీకారాన్ని తెలియచేయాల్సిందిగా కేంద్రం పేర్కొంది. అలాగే 90 రోజుల్లోగా ప్రాజెక్టు డీపీఆర్ను కూడా సమర్పించాల్సిందిగా సూచించింది.
కేంద్రం సూచించిన మార్గరద్శకాలతో పాటు రాష్ట్ర ప్రభుత్వం ప్రకటించిన ప్రోత్సాహకాలను అందించాల్సిందిగా కేంద్ర మంత్రిత్వశాఖ తన లేఖలో పేర్కొంది. మరోవైపు బల్క్ డ్రగ్ పార్కు ఏర్పాటులో భాగంగా కేంద్రం గ్రాంట్ ఇన్ ఎయిడ్గా 1000 కోట్ల రూపాయల ఆర్థిక సాయం అందించనుంది. దేశవ్యాప్తంగా బల్క్ డ్రగ్ పార్కుల కోసం 13 రాష్ట్రాలు పోటీ పడితే అందులో 3 రాష్ట్రాలు మాత్రమే దక్కించుకున్నాయి. దక్షిణాది రాష్ట్రాల్లో తెలంగాణా, తమిళనాడు, కర్ణాటక రాష్ట్రాలు బల్క్ డ్రగ్ పార్కు కోసం పోటీ పడ్డాయి.