కాలువలోకి దూసుకెళ్లిన కారు.. ముగ్గురు మృతి

07:06 December 04

కోటిపల్లి-యానాం ఏటి గట్టు రహదారిపై ప్రమాదం

ఇంటికి రాబోయే కోడలికి కొత్తబట్టలు ఇచ్చి...  వివాహ సందడితో ఇంటికి వస్తున్న కుటుంబంలో... మృత్యువు విషాదం నింపింది. తూర్పుగోదావరి జిల్లా కోట వద్ద ఏటిగట్టు రహదారిపై పక్కనే ఉన్న చెరువులోకి కారు దూసుకెళ్లిన ఘటనలో... యానాంకు చెందిన ముగ్గురు కుటుంబసభ్యులు మృతిచెందారు. గురువారం రాత్రి 11 దాటినా తల్లిదండ్రులు, తమ్ముడు రాకపోవటంతో కంగారుపడిన పెద్దకుమారుడు బంధువుల ద్వారా గాలింపు చర్యలు చేపట్టడంతో ప్రమాదం జరిగిన విషయం వెలుగులోకి వచ్చింది.  తెలుగు అధ్యాపకురాలిగా, మంచి వక్తగా, కవయిత్రిగా గుర్తింపు పొందిన విజయలక్ష్మి విశ్రాంత ఉపాధ్యాయుడైన ఆమె భర్త ప్రసాద్ , బ్యాంకు మేనజర్  అయిన కుమారుడు ప్రణీత్ తో కలసి కొత్తకారులో ప్రయాణిస్తుండగా ఈ ప్రమాదం జరిగింది. ప్రణీత్ కు జొన్నాడ బ్రిడ్జి దిగువ నుంచి యానాంకు ఏటిగట్టు మార్గం అంతగా తెలియకపోవటంతో ఎదురుగా ఉన్న మలుపులు గుర్తించక... కారును పక్కకు తిప్పటంతో చెరువులోకి పల్టీ కొట్టింది. ఈ ఘటనలో కారులోని ముగ్గురూ మరణించారు.

నాలుగు రోజుల క్రితం నిశ్చితార్థం.. ఇంతలోనే...

ప్రణీత్​కు 4 రోజుల క్రితం రాజమహేంద్రవరం సమీపంలోని ఓ గ్రామానికి చెందిన బ్యాంకు ఉద్యోగిణితో యానాంలో పెళ్లిచూపులు కార్యక్రమం జరిగింది. గురువారం అమ్మాయికి కొత్త బట్టలు, ఇతర వస్తువులు ఇచ్చేందుకు తల్లిదండ్రులతో వెళ్లిన ప్రణీత్ ఆ కార్యక్రమం ముగించుకుని, కొత్త కారు కొనుగోలు చేసి  యానాం బయలుదేరారు. జొన్నాడ బ్రిడ్జి దిగువ నుండి యానాంకి దగ్గరి దారైన ఏటిగట్టు మార్గంలో వస్తున్నారు. కారు లేటెస్ట్ వెర్షన్ కావడం, ప్రణీత్​కు ఈ మార్గం కొత్త కావడంతో ఎదురుగా ఉండే మలుపులను గుర్తించకపోవడంతో కారు నేరుగా రోడ్డు పక్కనున్న చెరువులో పల్టీ కొట్టింది. ముగ్గురూ ఘటనా స్థలిలోనే ప్రాణాలు కోల్పోయారు.  

ప్రమాదకర మార్గం...కానరాని హెచ్చరికలు...

యానాం నుంచి ద్రాక్షారామం, రామచంద్రాపురం మీదుగా రాజమహేంద్రవరం చేరుకోవాలంటే 65 కిలోమీటర్లు ప్రయాణించాలి. ఇటీవల కురిసిన భారీ వర్షాలకు ఈ మార్గం పూర్తిగా ధ్వంసం కావడంతో ద్విచక్ర, చిన్నకార్ల రాజమహేంద్రవరం వెళ్లేందుకు ఏటిగట్టు మార్గాన్నే ప్రయాణాలు సాగిస్తున్నారు. సింగిల్ లైన్,  ఎన్నో మలుపులుతో ప్రమాదంగా ఉన్నా ఈ దారిలోనే వాహనాల రాకపోకలు సాగుతున్నాయి. ప్రమాదం సంబంధించే ప్రాంతాల వద్ద ఏ సూచికలు, ప్రమాద నివారణ బారికేడ్లను ఈ మార్గంలో ఏర్పాటుచేయలేదు. దీంతో కొత్తగా ఈ మార్గం నుంచి వచ్చే వారు అజాగ్రత్తగా వాహనాలు నడిపి ప్రాణాలు కోల్పోతున్నారని స్థానికులు అంటున్నారు. ఈ రహదారి అభివృద్ధికి ప్రభుత్వం పాలనా అనుమతులు ఇచ్చినా రివర్స్ టెండరింగ్​తో పనులు నిలిచిపోయాయని స్థానికులు తెలిపారు.

వీరంతా.. కేంద్ర పాలిత ప్రాంతం యానాంకు చెందిన వారిగా పోలీసులు తెలిపారు. కొత్త కారు కొనుగోలు చేసి యానాం వెళ్తుండగా ఘటన జరిగిందన్నారు. మృతదేహాలను తూర్పు గోదావరి జిల్లా రామచంద్రాపురం ఆస్పత్రికి తరలించారు.

ఇదీ చదవండి: