కరోనా ప్రభావం నేపథ్యంలో ఇకపై అన్నవరం సత్యదేవుని దర్శనానికి వచ్చే భక్తులకు ప్యాకెట్ల రూపంలో ఆహారం అందించేందుకు అధికారులు ప్రణాళిక సిద్దం చేస్తున్నారు. సామాజిక దూరం పాటంచేలా జాగ్రత్తలు తీసుకోవడం కష్టమయ్యే పరిస్థితుల్లో ఆహారాన్ని ప్యాకెట్ల రూపంలో అందించాలని భావిస్తున్నారు. లాక్ డౌన్ ఎత్తివేసిన అనంతరం దర్శనాలకు భక్తులను అనుమతించేలా అదేశాలొస్తే కరోనా వ్యాప్తి చెందకుండా తీసుకోవాల్సిన జాగ్రత్తలపై దేవస్థానం అధికారులు ప్రణాళిక రచిస్తున్నారు.
దేవస్థానంలో నిత్యం జరిగే వ్రతాలు, నిత్య కల్యాణం, ఆయుష్య హోమం, చండీ హోమాలకు భక్తులు ఆన్లైన్ ద్వారా రుసుము చెల్లిస్తే, వారి పేరు మీద పూజ చేసి పరోక్షంగా పాల్గొనే విధంగా ఏర్పాట్లు చేశారు. లాక్డౌన్ అనంతరం ఇలా పూజ చేయించుకునే భక్తులకు ప్రసాదాన్ని పోస్ట్ ద్వారా పంపేలా చర్యలు తీసుకుంటున్నారు. టోల్ గేట్ వద్ద, మెట్ల మార్గం, ప్రధానాలయం వద్ద డిస్ ఇన్ఫెక్షన్ టన్నల్, శానిటైజర్ స్టాండ్లు ఏర్పాటు చేయడంతో పాటు థర్మల్ స్కాన్ ద్వారా పరీక్షించి కొండపైకి అనుమతించేలా చర్యలు చేపడుతున్నారు.