తూర్పు గోదావరి జిల్లా కోనసీమలో అంబేడ్కర్ జయంతి ఉత్సవాలు సందర్భంగా అమలాపురం పార్లమెంటు సభ్యురాలు చింతా అనురాధ నివాళులు అర్పించారు. పి.గన్నవరంలో అంబేడ్కర్ విగ్రహానికి పూలమాల వేసి అంజలి ఘటించారు. కొత్తగా ఏర్పాటు చేయబోయే జిల్లాల్లో అమలాపురం పార్లమెంటరీ నియోజకవర్గానికి అంబేడ్కర్ జిల్లాగా నామకరణం చేసేందుకు కృషి చేస్తానని ఎంపీ అనురాధ వెల్లడించారు.
రాజమహేంద్రవరంలో జక్కంపూడి ఫౌండేషన్ ఆధ్వర్యంలో అంబేడ్కర్ 130వ జయంతి వేడుకలు నిర్వహించారు. వైకాపా యువ నేత జక్కంపూడి గణేష్.. నగరంలో 33 దళిత వాడల్లో చలివేంద్రాలు ప్రారంభించారు. విశ్వజ్ఞాని భారతరత్న డాక్టర్ బి.ఆర్ అంబేడ్కర్ ఆశయ సాధనకు ప్రతీ ఒక్కరూ కృషి చేయాలని గణేష్ పేర్కొన్నారు. గోకవరం బస్ స్టాండ్ వద్ద గల డాక్టర్ బి.ఆర్. అంబేడ్కర్ విగ్రహానికి పూలమాలలు వేసి నివాళులు అర్పించారు. కంబాల చెరువు వద్ద గల మాజీ మంత్రి దివంగత శ్రీ జక్కంపూడి రామోహన్ రావు విగ్రహానికి పూలమాలలు వేసి నివాళులు అర్పించారు.