విద్యుత్ అధికార్ల నిర్లక్ష్యానికి యవకుడు బలి

విద్యుత్​ అధికారుల నిర్లక్ష్యంతోనే తమ కుమారుడు మృతి చెందాడని కుటుంబం యువకుని మృతదేహంతో రోడ్డుపై బైఠాయించి నిరసన వ్యక్తం చేసింది. తూర్పుగోదావరి జిల్లా రాజమండ్రి వద్ద ఉన్న క్వారీపేటలో ఈ ఘటన చోటుచేసుకుంది.

విద్యుత్​శాఖ అధికారుల నిర్లక్ష్యంతో ఓ నిండు ప్రాణం బలైపోయింది. తూర్పుగోదావరి జిల్లా రాజమండ్రి వద్ద ఉన్న క్వారీ పేటకు చెందిన అర్జున్ అనే యువకుడు బహిర్భుమికని వెళ్లి విద్యుత్​షాక్​కు గురై అక్కడికక్కడే మరణించాడు. 11 కేవీ విద్యుత్ వైర్లు కిందికి ఉండటంతోనే యువకుడు మృతి చెందాడని గ్రామస్తులు ఆరోపించారు. మృతదేహంతో భాదిత కుటుంబం విద్యుత్ సబ్​స్టేషన్ ఎదురుగా ఉన్న రోడ్డు పై బైఠాయించి ధర్నాకు దిగింది. విద్యుత్ వైర్లు చేతికందే ఎత్తులో ఉన్నాయని అధికారులకు ఎన్నిసార్లు విజ్ఞప్తి చేసినా పట్టించుకోకపోవటం వల్లే, ఈ ఘోరం జరిగిందని ఆవేదన వ్యక్తం చేశారు. మృతుని కుటుంబానికి ఎక్స్​గ్రేషియాగా పది లక్షలు చెల్లించాలని డిమాండ్ చేశారు. పోలీసులు ఘటనా స్థలానికి చేరుకొని మృతుని కుటుంబ సభ్యులకు సర్దిచెప్పడంతో పరిస్థితి అదుపులోకి వచ్చింది.

ఇదీ చదవండి : వాటర్ హీటర్ షాక్ కొట్టడంతో బాలుడి మృతి