తిరుమల తిరుపతి దేవస్థానాల్లో ఉప‌యోగించిన పుష్పాల‌తో ప‌రిమ‌ళాలు వెదజల్లే అగ‌ర‌బ‌త్తులు త‌యారుచేసి భ‌క్తుల‌కు అందుబాటులోకి తీసుకువచ్చారు. తిరుపతిలోని ఎస్వీ గోశాలలో అగరబత్తుల విక్రయాన్ని తితిదే ఛైర్మన్ సుబ్బారెడ్డి ప్రారంభించారు. తిరుమల ఏడు కొండలను ప్రతిబింబించేలా ఏడు రకాల అగరబత్తులను ఉత్పత్తి చేయనున్నట్లు ఛైర్మన్ తెలిపారు. వైఎస్సార్ ఉద్యాన విశ్వవిద్యాలయంతో కలిసి ఆలయాల్లో వినియోగించిన పూలతో దేవుడి చిత్రపటాలు, కీ చైన్లు, పేపర్ వెయిట్లు వంటి ఇతర వస్తువులను తయారు చేసేందుకు ఒప్పందం చేసుకున్నట్లు ఛైర్మన్ తెలిపారు. ఎండు పూలతో చిత్రపటాలు తయారు చేసేందుకు 83 లక్షలతో యంత్రాలు కొనుగోలు చేయనున్నట్లు ఛైర్మన్ తెలిపారు. గడిచిన కొన్ని రోజులుగా ముద్రణ ఆగిపోయిన సప్తగిరి మాసపత్రికను తిరిగి ప్రారంభించామన్నారు.
ఆలోచనకు పునాది పడింది ఇలా..
తితిదే (TTD) ఆలయాల్లో పూజ‌లు, అలంక‌ర‌ణ‌ల‌కు రోజూ పుష్పాలు వినియోగిస్తున్నారు. ప‌ర్వ‌దినాలు, ఉత్స‌వాల స‌మ‌యంలో అయితే పుష్పాల వినియోగం మ‌రింత అధికంగా ఉంటుంది. దేవతామూర్తులకు ఉప‌యోగించిన పుష్పాల‌న్నీ మ‌రుస‌టిరోజు ఉద‌యం తొల‌గిస్తారు. దీంతో స్వామివారి సేవ‌కు వినియోగించిన ఈ పుష్పాలు వృథా కాకుండా తిరిగి ఉప‌యోగించే విష‌యంపై తితిదే బోర్డు వినూత్న ఆలోచన చేసింది. ఈ క్రమంలో బెంగ‌ళూరు కేంద్రంగా పనిచేస్తున్న ద‌ర్శ‌న్ ఇంట‌ర్నేష‌న‌ల్ సంస్థ తితిదే ఆలయాల్లో రోజువారీగా వినియోగించిన పుష్పాల‌ను అందిస్తే లాభంతో సంబంధంలేకుండా అగ‌ర‌బ‌త్తులు త‌యారుచేసేందుకు ముందుకొచ్చింది. దీంతో ఆ సంస్థ‌తో తితిదే అవగాహన కుదుర్చుకొని ఎస్వీ గోశాలలో అగరబత్తుల త‌యారీకి అవ‌స‌ర‌మైన స్థ‌లం కేటాయించింది. ద‌ర్శ‌న్ ఇంట‌ర్నేష‌న‌ల్ సంస్థ సొంత ఖ‌ర్చుతో యంత్రాలు, సిబ్బందిని నియ‌మించుకుని కొన్ని రోజులుగా ప్ర‌యోగాత్మ‌కంగా అగరబత్తుల ఉత్ప‌త్తిని ప్రారంభించింది.