కుప్పం రెస్కో: 'ఇప్పుడేంటి పరిస్థితి.. ఎవరి మాట నమ్మాలి..?'

లక్షా ఇరవై వేల మంది వాటాదార్లు... అంతకుమించి విద్యుత్ కనెక్షన్లు... 40 ఏళ్ల సుదీర్ఘ చరిత్ర ఉన్న చిత్తూరు జిల్లా కుప్పం గ్రామీణ విద్యుత్ సహకార సమాఖ్య రద్దు నిర్ణయం వివాదం రేపుతోంది. నాలుగు దశాబ్దాలుగా రైతుల శ్రేయస్సు కోసం కృషి చేస్తున్న సంస్థను... వైకాపా ప్రభుత్వం ఉద్దేశపూర్వకంగా రద్దు చేస్తున్నట్లు ప్రకటించిందని తెదేపా నేతలు ఆందోళనకు దిగగా... మంత్రి పెద్దిరెడ్డి మాత్రం రద్దు నిర్ణయం ఉండబోదని... ప్రజలు ఆందోళన చెందాల్సిన అవసరం లేదని హామీ ఇచ్చారు.

చిత్తూరు జిల్లా కుప్పంలో వందశాతం నాణ్యమైన విద్యుత్తు అందించటమే లక్ష్యంగా... 1981లో ఏర్పాటైన గ్రామీణ విద్యుత్ సహకార సమాఖ్య- రెస్కోను రద్దు చేస్తూ ఎలక్ట్రిసిటీ రెగ్యులేటరీ కమిషన్ తీసుకున్న నిర్ణయంపై ఆందోళన వ్యక్తమవుతోంది. కుప్పం నియోజకవర్గంలోని నాలుగు మండలాల సహా... వి.కోట నియోజకవర్గంలోని పది పంచాయతీలతో కలిపి మొత్తం 110 పంచాయతీలు... 697 గ్రామాల్లో లక్షా ఇరవై రెండు వేల మంది ఈ సంస్థలో వాటాదార్లుగా ఉన్నారు. లక్షా ఇరవై నాలుగు వేల గృహ, వాణిజ్య, వ్యవసాయ విద్యుత్ కనెక్షన్లు కుప్పం రెస్కో పరిధిలో ఉన్నాయి.

ప్రత్యేకించి చెరకు, టమాటా, పట్టు, ఉద్యాన పంటల రైతులకు స్థానికంగా ఉన్న రెస్కోనే ఆసరాగా నిలుస్తోంది. అలాంటిది సంస్థను రద్దు చేస్తూ.. ఏపీ ఎస్పీడీసీఎల్​లో విలీనం చేయాలంటూ ఈఆర్​సీ తీసుకున్న నిర్ణయంపై సర్వత్రా విమర్శలు వినిపిస్తున్నాయి. ఇప్పటికే ఈ అంశంపై తెదేపా అధినేత చంద్రబాబు ప్రభుత్వ ప్రధాన కార్యదర్శికి లేఖ రాయగా... ఆదివారం కుప్పం నియోజకవర్గంలో తెదేపా నేతలు ఆందోళన నిర్వహించారు. తమ జీవనాధారంగా ఉన్న సంస్థను పసలేని కారణాలతో నిర్వీర్యం చేసేందుకు ప్రభుత్వం ప్రయత్నం చేస్తోందంటూ నినాదాలు చేశారు.

కుప్పం నియోజకవర్గ తెదేపా ఇంఛార్జ్ పీఎస్ మునిరత్నం ఆధ్వర్యంలో ఆందోళన చేసిన తెదేపా నేతలు... ప్రజల అభిప్రాయాన్ని నివేదిక రూపంలో రెస్కో ఎండీకి అందజేశారు. తెదేపా అధినేత చంద్రబాబు సొంత నియోజకవర్గంలో... ఆయన్ను ఇబ్బంది పెట్టేందుకే ప్రభుత్వం ఇలాంటి చర్యలకు పాల్పడుతోందని ఆరోపించారు. ప్రభుత్వం నుంచి స్పష్టమైన హామీ ఉత్తర్వుల రూపంలో వెలువడే వరకు ఆందోళన విరమించేది లేదంటూ వ్యాఖ్యానించారు.

కుప్పంలో రెస్కో రద్దు నిర్ణయంపై మంత్రి పెద్దిరెడ్డి రామచంద్రారెడ్డి స్పందించారు. కుప్పంలో తెదేపా నేతలు కావాలనే రాద్ధాంతం చేస్తున్నారన్న ఆయన... రెస్కోను ఏపీ ఎస్పీడీసీఎల్​లో విలీనం కానివ్వమన్నారు. ఇకపైనా కుప్పం రెస్కో స్వయంప్రతిపత్తితోనే పని చేయనుందన్న మంత్రి... ఈ మేరకు ప్రభుత్వం నుంచి కావాల్సిన ఆదేశాలను జారీ చేస్తామన్నారు. మంత్రి హామీ ఇచ్చినా... ప్రభుత్వం నుంచి లిఖితపూర్వకంగా ఆదేశాలు వచ్చేంత వరకు కుప్పం రెస్కో కోసం ఆందోళన కొనసాగిస్తామని తెదేపా నేతలు స్పష్టం చేశారు.

ఇదీ చదవండీ... కుప్పం రెస్కో స్వాధీనం ఆదేశాలు రద్దు చేయండి: చంద్రబాబు