పులివెందుల్లో సీఎం జగన్​ను ఓడిస్తాం: మాజీమంత్రి అమర్​నాథ్​రెడ్డి

వైకాపా ప్రభుత్వం ప్రతిపక్షాలను అడ్డుకోవడంలో ఉన్న శ్రద్ధ అభివృద్ధిపై పెడితే బాగుంటుందని చిత్తూరు జిల్లా తెదేపానేతలు అన్నారు. మంత్రి పెద్దిరెడ్డి రామచంద్రారెడ్డిపై తీవ్ర స్థాయిలో విరుచుకుపడ్డారు.

చిత్తూరు జిల్లా తంబళ్లపల్లె నియోజకవర్గం అంగళ్లు వద్ద తెదేపా నేతలపై జరిగిన దాడిని ఆ పార్టీ నాయకులు తీవ్రంగా ఖండించారు. కిరాయి మనుషులతో ఎదుటి వారిని భయపెట్టి బెదిరించి ప్రలోభాలకు గురి చేయడం ముఖ్యమంత్రి జగన్​, మంత్రి పెద్దిరెడ్డి రామచంద్రారెడ్డిలకు వెన్నతో పెట్టిన విద్యని మాజీమంత్రి అమర్​నాథ్ రెడ్డి కలికిరిలో అన్నారు. కుప్పం నియోజకవర్గంలో చంద్రబాబును ఓడిస్తామని మంత్రి పెద్దిరెడ్డి చెప్పడం హాస్యాస్పదమన్నారు. వచ్చే ఎన్నికల్లో పులివెందులలో జగన్​ను ఓడిస్తామని మాజీ మంత్రి పేర్కొన్నారు. జిల్లాలో ఇటీవల కురిసిన వర్షాలకు రహదారులన్నీ గుంతలు పడి రాకపోకలకు ఇబ్బందిగా మారాయని.... వైకాపా నేతలు జిల్లాలో అభివృద్ధిని పక్కనబెట్టి ప్రతిపక్ష పార్టీ నాయకులపై దాడులు చేయడమే పనిగా పెట్టుకున్నారని అమర్​నాథ్ రెడ్డి విమర్శించారు.

ఆంగళ్లులో జరిగిన ఘటన సీసీ కెమెరాల్లో రికార్డయిందని... ఫుటేజ్​ను పరిశీలిస్తే నిందితులెవరో గుర్తించవచ్చని పొలిట్ బ్యూరో సభ్యులు శ్రీనివాసులరెడ్డి పేర్కొన్నారు. కుప్పంలో చంద్రబాబును ఓడించే శక్తి పెద్దరెడ్డికి లేదన్నారు. ప్రభుత్వం మీద విశ్వాసం లేక స్థానిక ఎన్నికలను వాయిదా వేస్తున్నారని ఆరోపించారు.

ఇదీ చదవండి:వైకాపా, తెదేపాపై‌ సర్జికల్‌ స్ట్రైక్స్‌ అవసరం: ఎంపీ జీవీఎల్