లంచం తీసుకుంటూ.. ఏసీబీకి రెడ్ హ్యాండెడ్​గా పట్టుబడ్డ తహసీల్దార్.. ఇద్దరు అరెస్ట్

Tehsildar caught red handed by ACB: మరణించిన తల్లిదండ్రుల పేరుపై ఉన్న ఆస్తిని తమకి బదలాయించాలని కోరుతూ తహసీల్దార్ కార్యాలయం చుట్టూ తిరిగిన రైతు లంచం బాధ భరించలేక ఏసీబీ అధికారులను ఆశ్రయించాడు. ఫలితంగా ఏసీబీ అధికారులు పన్నిన వలలో తహసీల్దార్, వీఆర్ఓ ఇద్దరూ చిక్కి అరెస్టు అయ్యారు. ఈ ఘటన చిత్తూరు జిల్లా గంగాధర నెల్లూరు నియోజకవర్గం శ్రీరంగరాజపురం మండలంలో జరిగింది.

Tehsildar caught red handed by ACB: చిత్తూరు జిల్లా గంగాధర నెల్లూరు నియోజకవర్గం శ్రీరంగరాజపురం మండలంలోని ఓ గ్రామంలో చనిపోయిన తల్లిదండ్రుల పేరు మీద ఉన్న ఆస్తిని తమకు బదలాయించాలని కోరుతూ ఓ రైతు తహసీల్దార్ కార్యాలయాన్ని ఆశ్రయించాడు. అయితే అక్కడ లంచం బాధ భరించలేక అతడు ఏసీబీ అధికారులను ఆశ్రయించాడు. దీంతో ఏసీబీ ఆధికారులు పన్నిన వలలో తహసీల్దార్, వీఆర్ఓ ఇద్దరూ చిక్కి అరెస్టయ్యారు. వివరాల్లోకి వెళ్తే..

చిన్న శెట్టివాత్తం గ్రామానికి చెందిన లక్ష్మణ్ రెడ్డి తల్లిదండ్రులు మరణించారు. దీంతో తమ తల్లిదండ్రుల పేరుపై ఉన్న ఆస్తిని తన అన్న వెంకట్​రెడ్డి పేరుపై బదలాయించాలని కోరుతూ తమ పంచాయతీ పరిధిలోని సచివాలయంలో దరఖాస్తు చేసుకున్నారు. సుమారు నెలరోజుల పాటు తహసీల్దార్ కార్యాలయం చుట్టూ తిరిగారు. అయినా ఫలితం దక్కకపోవడంతో పక్క పంచాయతీ వీఆర్ఓ గోవిందరెడ్డి సాయంతో తహసీల్దార్​తో ఒప్పందం కుదుర్చుకున్నారు.

శ్రీరంగ రాజపురం మండలం తహసీల్దార్ కార్యాలయంలో వీఆర్ఓ గోవిందరెడ్డి సాయంతో రైతు లక్ష్మణ్ రెడ్డి తహసీల్దారును సంప్రదించాడు. అయితే రికార్డులను బదలాయించేందుకు అతడిని రూ.25 వేలు ఇవ్వమని తహసీల్దార్ డిమాండ్ చేసినట్లు సమాచారం. రైతు రూ.20 వేలకు ఒప్పందం కుదుర్చుకొన్నాడు. అయితే తహసీల్దార్​కు లంచం ఇవ్వడం ఇష్టం లేక అతడు ఏసీబీ అధికారులను ఆశ్రయించాడు. తిరుపతి ఏసీబీ విభాగం ఏఎస్పీ దేవప్రసాద్ నేతృతంలో అధికారులు తహసీల్దార్ కార్యాలయంపై దాడులు జరిపి లంచం తీసుకుంటున్న తహసీల్దారును రెడ్ హ్యాండెడ్​గా పట్టుకుని అదుపులోకి తీసుకున్నారు.

ఆ సమయంలో రైతు నుంచి లంచం తీసుకున్న తహసీల్దార్.. సదరు నగదును వీఆర్వో గోవిందరెడ్డికి ఇవ్వడంతో ఏసీబీ అధికారులు తహసీల్దార్, వీఆర్ఓలను అదుపులోకి తీసుకున్నారు. రైతు నుంచి లంచం తీసుకున్నట్లు తేలడంతో ఇద్దరిపై కేసు నమోదు చేసి అరెస్టు చేయనున్నట్లు ఏఎస్పీ దేవ ప్రసాద్ తెలిపారు. ఆ తహసీల్దార్ కార్యాలయంపై ఏసీబీ దాడులు జరుగుతున్నాయన్న సమాచారం మండలం అంతా వ్యాపించడంతో గతంలో తహసీల్దార్ కారణంగా వివిధ రూపాల్లో బాధింపబడిన బాధితులంతా కార్యాలయం వద్దకు పరుగులు తీశారు.

ఈ ఘటనతో మండలానికి తహసీల్దారు రూపంలో పట్టిన అవినీతి మచ్చ తొలగిపోయిందని బాధితులు హర్షం వ్యక్తం చేశారు. తహసీల్దార్ షబ్బీర్ భాష శ్రీరంగరాజపురం మండలంలో బాధ్యతలు చేపట్టిన అనతి కాలంలోనే అధికార పార్టీ నేతల అండదండలతో కోట్ల రూపాయలు గడించినట్లు విశ్వసనీయ సమాచారం. గతంలో శ్రీరంగరాజపురం మండల ప్రజా ప్రతినిధుల కోరిక మేరకు చిత్తూరు జిల్లా జాయింట్ కలెక్టర్ తహసీల్దార్​పై విచారణ చేపట్టారు. అయినప్పటికీ తహసీల్దార్ ప్రవర్తనలో మార్పు రాకపోవడం ఇక్కడి అధికార పార్టీ నేతల మద్దతుకు ఉదాహరణగా పేర్కొనవచ్చని స్థానికులు వాపోతున్నారు.

ఇవీ చదవండి: