వ్యక్తి అనుమానాస్పద మృతి... బాధితుల ఆందోళన

పుత్తూరుకు చెందిన ఓ వ్యక్తి అనుమానాస్పదంగా మృతి చెందాడు. బంధువులు రహదారిపై మృతదేహంతో బైఠాయించారు. బాధితుల ఫిర్యాదు మేరకు పోలీసులు కేసు నమోదు చేశారు.

చిత్తూరు జిల్లా పుత్తూరు చెందిన ఓ వ్యక్తి మరణం.. ఉద్రిక్తతకు దారి తీసింది. పుత్తూరుకు చెందిన బాలసుబ్రమణ్యం అనే వ్యక్తి భార్య గౌరి.. మూడు రోజుల క్రితం ఆత్మహత్య చేసుకుని మరణించింది. గౌరీ కుటుంబ సభ్యులు దాడి చేస్తారమోనని భయంతో బాలసుబ్రమణ్యం గ్రామం విడిచి వెళ్లిపోయాడు. బుధవారం బాలసుబ్రమణ్యం చిన్నాన్న కృష్ణయ్య... పిల్లల పాఠశాల ధ్రువ పత్రాలు కోసం పుత్తూరుకు వచ్చాడు.

ఆ సమయంలో గౌరీ కుటుంబ సభ్యులు కృష్ణయ్యతో ఘర్షణ పడ్డారని... ఆ ఘర్షణలో కృష్ణయ్య మృతి చెందారని కుటుంబ సభ్యులు ఆరోపిస్తున్నారు. కృష్ణయ్య మృతదేహంతో కార్వేటినగరం కూడలిలో ధర్నా చేశారు. పోలీసులు తమకు న్యాయం చేయాలని డిమాండ్ చేశారు. డీఎస్పీ సంఘటన స్థలానికి చేరుకొని ధర్నా చేస్తోన్న కృష్ణయ్య కుటుంబ సభ్యులను వారించారు. పోస్టుమార్టం నిమిత్తం దేహాన్ని స్థానిక ఆస్పత్రికి తరలించారు. బాధితుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సీఐ రాజు తెలిపారు.

ఇదీ చదవండి : 'రాజధాని రైతులను ఇబ్బంది పెట్టినవారిని వదలం'