యోగా, ధ్యానంతో ఆలోచనా శక్తి మెరుగు పడుతుంది: రాష్ట్రపతి

విద్యార్థి దశ నుంచే యోగాభ్యాసాన్ని అలవర్చుకోవాలని రాష్ట్రపతి రామ్‌నాథ్ కోవింద్ పిలుపునిచ్చారు. యోగా, ధ్యానం ద్వారా ఆలోచనా శక్తి మెరుగుపడుతుందన్నారు. ఆదివారం చిత్తూరు జిల్లాకు వచ్చిన రాష్ట్రపతి...మదనపల్లె, సదుం మండలాల్లో పర్యటించారు.

సత్సంగ్ ఫౌండేషన్ ఆశ్రమ సందర్శన కోసం...చిత్తూరు జిల్లాలో రాష్ట్రపతి రామ్​నాథ్ కోవింద్ పర్యటించారు. బెంగళూరు నుంచి హెలికాప్టర్‌లో మదనపల్లె మండలం చిప్పిలికి వచ్చిన కోవింద్‌కు...ముఖ్యమంత్రి జగన్, మంత్రులు నారాయణ స్వామి, పెద్దిరెడ్డి... స్వాగతం పలికారు. అనంతరం నక్కలదిన్నె సమీపంలోని సత్సంగ్ ఫౌండేషన్‌కి వెళ్లారు.

ఆశ్రమంలోని భారత్ యోగ విద్యా కేంద్రం, యోగశాలను రాష్ట్రపతి రామ్​నాథ్‌ ప్రారంభించారు. ఆశ్రమ వాసులు, యోగా శిక్షకులతో కాసేపు ముచ్చటించి...వారి అనుభవాలను అడిగి తెలుసుకున్నారు. తర్వాత ఆశ్రమ ఆవరణలో మొక్కలు నాటారు. 38 పడకలతో నిర్మించనున్న స్వాస్థ్య ఆసుపత్రికి శంకుస్థాపన చేశారు. ఆ తర్వాత సత్సంగ్ విద్యాలయ విద్యార్థులతో రాష్ట్రపతి సరదాగా గడిపారు.

అనంతరం రాష్ట్రపతి సదుంలోని పీపుల్ గ్రోవ్ పాఠశాలను సందర్శించి..విద్యార్థులతో ముఖాముఖి నిర్వహించారు. విద్యార్థులంతా అన్ని భాషలపై పట్టు సాధించి...ఉన్నత శిఖరాలను అధిరోహించాలని సూచించారు. పాఠశాల ప్రాంగణాన్ని తిలకించి...మొక్కలు నాటారు. అనంతరం రాష్ట్రపతి.. మదనపల్లెకు చేరుకుని అక్కడి నుంచి బెంగళూరుకు తిరుగు పయనమయ్యారు.

ఇదీ చదవండి: