శ్రీవారికి పోస్కో సీఈవో 10 కోట్ల విరాళం

తిరుమల శ్రీవారిని ప్రముఖులు దర్శించుకున్నారు. పోస్కో సంస్థ సీఈవో స్వామివారికి 10 కోట్ల రూపాయలను విరాళం గా అందించారు. ఆలయాలను ప్రభుత్వం రక్షించాలని చిన్నజీయర్ స్వామి విజ్ఞప్తి చేశారు.చెక్‌ సినిమా విడుదల నేపథ్యంలో స్వామివారి సేవలో హీరో నితిన్ పాల్గొన్నారు. అంతర్వేది రథం పూర్తైన సందర్భంగా మంత్రి వేణుగోపాలకృష్ణ శ్రీనివాసుడికి పూజలు చేశారు.

పోస్కో సంస్థ 10 కోట్ల విరాళం..

తిరుమల తిరుపతి దేవస్థానానికి పోస్కో సంస్థ సీఈవో సంజయ్ పాసి 10 కోట్ల రూపాయల విరాళాన్ని అందించారు. వీటిలో 9 కోట్ల ఎస్వీబీసీ ఛానల్‌ కోసం కాగా.. మిగిలిన కోటి రూపాయల అన్నదానం ట్రస్టు కోసం వెచ్చించాలని కోరారు. శ్రీవారిని దర్శించుకున్న అనంతరం పోస్కో సంస్థ సీఈవో సంజయ్ పాసి దంపతులు.. ఆలయంలోని రంగ‌నాయ‌కుల మండ‌పంలో అదనపు ఈవో ధర్మారెడ్డికి విరాళాన్ని అందించారు. దాతలకు పండితులు వేదాశీర్వచనం చేసి తీర్థ ప్రసాదాలను అందజేశారు.

ఆలయాలను ప్రభుత్వం రక్షించాలి..!

ఆలయాలను ధ్వంసం చేసి ప్రజల్లో విశ్వాసాన్ని చెదిర్చే ప్రయత్నం చేస్తున్నారని త్రిదండి చిన్నజీయర్ స్వామి ఆవేదన వ్యక్తం చేశారు. తిరుమల శ్రీవారిని చిన్నజీయర్‌ స్వామి దర్శించుకున్నారు. అధికారులు ఆలయ మర్యాదలతో స్వాగతం పలికి మూలమూర్తి దర్శనం కల్పించారు. కరోనా నుంచి విముక్తి కలగాలని స్వామివారిని ప్రార్థించానన్న త్రిదండి.. రామతీర్థంలో విగ్రహ ధ్వంసం ఆలయాల మీద జరిగే దాడులకు పరాకాష్ట అన్నారు. ఆలయాలు ధర్మానికి మూల కేంద్రాలని.. ఆలయాల మీద ఆధారపడే ఆన్ని కళలు జీవిస్తున్నాయన్నారు. ఆలయాలను ప్రభుత్వం రక్షించాలన్నారు.

అంతర్వేది రథం పనులు పూర్తైన సందర్బంగా

శ్రీవారిని మంత్రి చెల్లుబోయిన వేణుగోపాలకృష్ణ దర్శించుకున్నారు. ఈ ఉదయం వీఐపీ ప్రారంభ దర్శన సమయంలో స్వామివారి సేవలో పాల్గొన్నారు. మంత్రికి తితిదే అధికారులు స్వాగతం పలికి ప్రత్యేక దర్శన ఏర్పాట్లు చేశారు. అంతర్వేది రథం పనులు పూర్తయిన సందర్బంగా స్వామివారి ఆశీస్సుల కోసం వచ్చినట్లు మంత్రి తెలిపారు.

చెక్‌ సినిమా విడుదల

సినీ నటుడు నితిన్‌ శ్రీవారిని దర్శించుకున్నారు. చెక్‌ సినిమా విడుదల నేపథ్యంలో స్వామివారి సేవలో పాల్గొన్నారు. ఆయనకు ఆలయ అధికారులు తీర్థప్రసాదాలు అందించారు.

ఇదీ చూడండి.విమానాశ్రయం లాంటి హంగులతో గుంతకల్ రైల్వే స్టేషన్‌