పోలింగ్ కేంద్రాల్లో రిగ్గింగ్.. మాజీ ఎమ్మెల్యేకు పోలీసుల నోటీసులు

పోలింగ్ కేంద్రాల్లో ఓట్ల రిగ్గింగ్​కు పాల్పడుతున్నారని మాజీ ఎమ్మెల్యే ఎస్​వీ నాయుడుకు పోలీసులు నోటీసులు ఇచ్చారు. తెదేపా నేతల ఫిర్యాదుతో పోలీసులు ఈ చర్యకు పాల్పడ్డారు. మరోవైపు పోలీసుల తీరుపై ఎస్​వీ నాయుడు తీవ్ర ఆగ్రహం వ్యక్తం చేశారు.

తిరుపతి పార్లమెంట్ ఉప ఎన్నికలో రిగ్గింగ్​కు పాల్పడుతున్నారంటూ.. మాజీ ఎమ్మెల్యే ఎస్​వీ నాయుడుపై తెదేపా నేతలు ఉన్నతాధికారులకు ఫిర్యాదు చేశారు. చిత్తూరు జిల్లా బీఎన్ కండ్రిగ మండలంలోని పలు పోలింగ్ కేంద్రాల వద్ద ఎస్​వీ నాయుడు ఏజెంట్లను బలవంతంగా బయటకు పంపించి దొంగఓట్లకు పాల్పడ్డారని ఆరోపించారు. తెదేపా నేతల ఫిర్యాదుతో ఎస్​వీ నాయుడుకు పోలీసులు నోటీసులు అందజేశారు. రాత్రి ఏడు గంటల వరకు ప్రధాన రహదారిపై ఆపేశారు. అనంతరం మాజీ ఎమ్మెల్యే ఎస్​వీ నాయుడును విడిచిపెట్టారు.

ఈ క్రమంలో పోలీసుల తీరుపై ఆగ్రహం వ్యక్తం చేసిన ఎస్​వీ నాయుడు.. అక్కడినుంచి వెళ్లే ప్రసక్తే లేదని తేల్చి చెప్పాడు. బంధువుల ఇంటికి వెళ్లి వస్తుండగా ఉద్దేశపూర్వకంగానే పోలీసులు నోటీసులు ఇచ్చారని మండిపడ్డారు. సమాచారం అందుకున్న స్థానిక పోలీసులు ఘటనా స్థలానికి చేరుకుని మాజీ ఎమ్మెల్యేకు నచ్చజెప్పి పంపించేశారు.

ఇదీచదవండి.