ప్రభుత్వం అమలు చేస్తున్న సంక్షేమ పథకాలను కులమతాలు, పార్టీలకు అతీతంగా అర్హులైన ప్రతీ లబ్ధిదారునికి అందించాల్సిన బాధ్యత సర్పంచులదే అని పంచాయతీ రాజ్, గ్రామీణ అభివృద్ధి శాఖ మంత్రి పెద్దిరెడ్డి రామచంద్రారెడ్డి అన్నారు. పుంగనూరు నియోజకవర్గ పరిధిలోని సర్పంచులకు శిక్షణా కార్యక్రమాన్ని మంత్రి ప్రారంభించారు. ఈ సందర్భంగా.. గ్రామస్థాయిలో సర్పంచులు నిర్వహించాల్సిన పాలన విధులపై అవగాహన కల్పించారు.
వాలంటీర్లు, సచివాలయ సిబ్బందితో కలిసి అభివృద్ధి కార్యక్రమాలు అమలు చేయాలన్నారు. సర్పంచులు.. తమ పంచాయతీ పరిధిలో వారానికి 2 రోజులు ఇంటింటికి వెళ్లి సంక్షేమ పథకాల అమలుపై వివరాలు సేకరించాలని మంత్రి సూచించారు. ప్రజాస్వామ్యంలో సర్పంచ్ పదవి గౌరవ ప్రదమైనదని.. దాన్ని సద్వినియోగించుకుంటే రాజకీయంగా ఉజ్వల భవిష్యత్ ఉంటుందన్నారు. మహిళా సర్పంచులు గ్రామస్థాయిలో జరిగే సమావేశాలకు కచ్చితంగా వెళ్లాలన్నారు.