చిత్తూరు జిల్లా శ్రీకాళహస్తీశ్వరాలయంలో బృహత్తర ప్రణాళిక అమలుకు అడ్డంకులు ఎదురవుతున్నాయి. ఆలయం చుట్టూ ఉన్న సన్నిధి వీధి, దిగువ సన్నిధి వీధి, రాజగోపురం పరిసర ప్రాంతాలతో పాటు గోపురం నుంచి రంగుల గోపురం లోపు 3.9 ఎకరాల స్థలాన్ని సేకరించాలని అధికారులు నిర్ణయించారు. ఇందులో ఉన్న దుకాణాలు, నివాస గృహాలు, వాణిజ్య సముదాయాలు ఇప్పటికే ఖాళీ చేయించారు. 199 మంది నిర్వాసితులకు రూ.99 కోట్లు పరిహారం ఇవ్వాలని ప్రణాళికలు సిద్ధం చేశారు. ఇందులో ఏడుగురు మినహాయించి మిగిలిన వాళ్లందరూ.. స్థలాలు, దుకాణ భవనాలు అప్పగించారు. మిగిలిన ఏడుగురు న్యాయస్థానాన్ని ఆశ్రయించగా..న్యాయస్థానం వారిలో ఆరుగురికి పరిహారం ఇప్పించింది.
అయితే ఇప్పటివరకు వారి నుంచి భవనాలను స్వాధీనం చేసుకోకపోవటంపై విమర్శలు తలెత్తుతున్నాయి. భూ సేకరణ పూర్తయితే తప్ప అభివృద్ధికి అడుగులు పడే అవకాశం కనిపించటం లేదు. న్యాయస్థానాన్ని ఆశ్రయించిన మరో నిర్వాసితుడికి పరిహారం ఇవ్వాల్సి ఉంది. బృహత్తర ప్రణాళిక ద్వారా అభివృద్ధి చేయాల్సిన పనులకు సంబంధించి దేవాదాయ శాఖ రెండు విడతలుగా నిధులిచ్చేందుకు అంగీకారం తెలిపింది. తొలుత రూ.86.01 కోట్లతో 11 పనులు, రెండో విడతగా రూ.56.39 కోట్లతో 8 రకాల పనులు చేపట్టేందుకు పచ్చజెండా ఊపింది. ముఖ్యంగా మహా ప్రకారం, రాహుకేతు పూజలకు వచ్చే భక్తులు నిరీక్షించే భవనాలు, వాణిజ్య సముదాయం, క్యూలైన్లు, స్వర్ణముఖి నది పరిసర ప్రాంతాలు సుందరీకరణ వంటి పనులు చేపట్టనున్నారు.