చిత్తూరు కార్పొరేషన్ పరిధిలోని 18 డివిజన్లలో తెదేపా అభ్యర్థులకు చెందిన నామినేషన్ల ఉపసంహరణపై పూర్తి వివరాలు సమర్పించాలని రాష్ట్ర ఎన్నికల సంఘాన్ని హైకోర్టు ఆదేశించింది. తమ నామినేషన్లను ఫోర్జరీ సంతకాలతో ఉపసంహరించారంటూ తెదేపా అభ్యర్థులు హైకోర్టులో పిటిషన్లు దాఖలు చేశారు. ఈ వ్యాజ్యంపై న్యాయమూర్తి జస్టిస్‌ డీవీఎస్‌ఎస్‌ ఆదివారం ఇంటి వద్ద విచారణ జరిపారు. ప్రభుత్వ న్యాయవాది సుమన్ .. ఈ వ్యాజ్యానికి విచారణ అర్హత లేదన్నారు. ఎన్నికల కమిషన్ సూపర్ ట్రైబ్యునల్ గా వ్యవహరిస్తోందన్నారు . ఎన్నికల్లో అక్రమాలపై ఎన్నికల ట్రైబ్యునల్ ను ఆశ్రయించడమే మార్గం అన్నారు. ఆ వాదనలను తోసిపుచ్చిన న్యాయమూర్తి.. ఎన్నికల ప్రక్రియకు కళంకం తీసుకొచ్చేలా వ్యవహారాలున్నప్పుడు సైతం న్యాయస్థానాలు జోక్యం చేసుకోకూడదా ? అని ప్రశ్నించారు .
ఎన్నికల్లో వంచనపూరితంగా వ్యవహరించినప్పుడు కోర్టులు జోక్యం చేసుకోవచ్చని పిటిషనర్ల తరపు సీనియర్ న్యాయవాది దమ్మాలపాటి శ్రీనివాస్ వాదనలు వినిపించారు. సుప్రీంకోర్టు ఈ వ్యవహారంపై పలు తీర్పులు ఇచ్చిందన్నారు. ఫోర్జరీ సంతకాలతో నామినేషన్లను ఉపసంహరించారంటూ ఎస్ఈసీకి ఫిర్యాదులు అందాయని ఎస్ఈసీ తరఫు న్యాయవాది అశ్వనీకుమార్ వాదనలు వినపించారు. అధికరణ 243 ను అనుసరించి ఈ వ్యవహారంపై కలెక్టర్ల నుంచి నివేదికలు కోరామన్నారు. సోమవారం ఆ ఫిర్యాదులపై స్థాయి నివేదికలను తెప్పించుకుని వాటిని కోర్టుకు సమర్పిస్తామన్నారు. అననంతరం ధర్మాసనం విచారణను నేటికి వాయిదా వేసింది. తిరుపతి ఏడో వార్డుకు సంబంధించి ఇప్పటికే పెండింగ్ లో ఉన్న కేసుతో సహా ఇవాళ మధ్యాహ్నం తదుపరి వాదనలు విననుంది.