రాయలసీమలో కొంత సస్యశామంగా కనిపించే చిత్తూరు జిల్లా... తాగునీరు లేక అల్లాడుతోంది. సుమారు 42 లక్షల జనాభా నివసిస్తున్న ఈ జిల్లాలో.. చాలా ప్రాంతాల్లో 10 రోజులకోసారి నీరు రావడం కలవరపెడుతోంది. జిల్లా తాగునీటి అవసరాలు తీర్చే తెలుగుగంగ కాలువ, కైలాసగిరి రిజర్వాయర్, కల్యాణి జలాశయం, మదనపల్లె సమీపంలోని చిప్పిలి జలాశయం, పెనుమూరు సమీపంలోని ఎన్టీఆర్ జలాశయాల్లో నీటిస్థాయి పడిపోయింది. ఏటా మదనపల్లె, తంబళ్లపల్లె, పుంగనూరు, పీలేరు మండలాల్లో మాత్రమే కరవు ఛాయలు కనిపించేవి. ఈ సారి శ్రీకాళహస్తి, సత్యవేడు, జీడీ నెల్లూరు మండలాల ప్రజలు నీటికోసం తీవ్ర ఇబ్బందులు పడుతున్నారు.
తిరుపతి నగరంలో సుమారు 4లక్షల మంది నివసిస్తుండగా... మరో లక్ష మంది నిత్యం రాకపోకలు సాగిస్తుంటారు. నీరు సరఫరా చేయాల్సిన నగరపాలక సంస్థ... తీవ్ర ఇబ్బందులు ఎదుర్కొంటోంది. సరైన నీటి నిల్వలు లేక... నాలుగు రోజులకోసారి నల్లాల ద్వారా నీరందిస్తున్నారు. శివారు ప్రాంతాలైన ఎమ్మార్ పల్లె, సరస్వతి నగర్, శ్రీ కృష్ణనగర్ వాసులకు 15రోజులకోసారి అందించడమూ కష్టంగా మారంది. ట్యాంకర్లతో సరఫరా చేస్తున్నా... ఏ మాత్రం సరిపోవడంలేదని ప్రజలు చెబుతున్నారు.
జిల్లాలో వర్షాభావ పరిస్థితుల కారణంగా 2వేల 677 గ్రామాల్లో తాగునీటి సమస్య ఉందని అధికారిక లెక్కలే చెబుతున్నాయి. జిల్లా వ్యాప్తంగా 2వేల 308 గ్రామాలకు ట్యాంకర్ల ద్వారా నీరందిస్తున్నారు. 367 గ్రామాలకు వ్యవసాయ బోర్లు అనుసంధానం చేసి దాహార్తి తీర్చే ప్రయత్నాలు ప్రారంభించారు. జిల్లాలోని అన్ని గ్రామాలకు తాగునీరు సరఫరా చేయాలని జిల్లా పాలనాధికారి పీఎస్ ప్రద్యుమ్న అధికారులను ఆదేశించారు.