తిరుపతి ట్రాఫిక్ కష్టాలు తీర్చేందుకు స్మార్ట్‌ ఎలివేటెడ్‌ కారిడార్‌ పేరుతో... తిరుచానూరు మార్కెట్‌యార్డు నుంచి కపిలతీర్థం సమీపంలోని నంది కూడలి వరకు గరుడ వారధి నిర్మాణం చేపట్టారు. దాదాపు 6 కిలోమీటర్ల పొడవైన పైవంతెన నిర్మాణాన్ని... 684 కోట్ల రూపాయల అంచనా వ్యయంతో తిరుపతి స్మార్ట్‌సిటీ కార్పొరేషన్‌, తితిదే సంయుక్తంగా ప్రారంభించాయి. ఇందులో తితిదే 458 కోట్లు, స్మార్ట్‌ సిటీ కార్పొరేషన్‌ 226 కోట్లు ఖర్చు చేయాలని నిర్ణయించాయి. నిర్మాణ పనులు దక్కించుకొన్న ఆఫ్కాన్‌ సంస్థ 6 నెలల కిందటే పనులు ప్రారంభించింది. కొన్ని పిల్లర్ల నిర్మాణం పూర్తి చేసింది.
అంతవరకు సాఫీగానే సాగినా... తితిదే కొత్త పాలకమండలి తొలి సమావేశంలోనే గరుడ వారధి నిర్మాణంపై అభ్యంతరం వ్యక్తం చేసింది. నిధుల కేటాయింపు, నిర్మాణం కొనసాగింపుపై రాష్ట్ర ప్రభుత్వమే నిర్ణయం తీసుకోవాలని అభిప్రాయపడింది. అంతలోపే.. ధార్మికేతర ప్రాజెక్టులకు తితిదే నిధులు వినియోగించడం సరికాదంటూ హైకోర్టులో పిటిషన్‌ దాఖలైంది. ఈ పరిస్థితుల్లో పనులు అర్ధాంతరంగా ఆగిపోయాయి.