విశాఖ జిల్లా నుంచి కర్ణాటకకు తరలిస్తున్న గంజాయిని చిత్తూరు జిల్లాలో పోలీసులు స్వాధీనం చేసుకున్నారు. మదనపల్లికి చెందిన ముగ్గురు మహిళలు ఒక యువకుడితో పాటు ఓమ్ని వ్యాన్ డ్రైవర్ ను కూడా ఎక్సైజ్ అధికారులు అదుపులోకి తీసుకున్నారు. వీరు విశాఖ జిల్లా చింతలపల్లి నుంచి గంజాయిని ఒక్కో ప్యాకెట్లో రెండు కిలోల చొప్పున ప్యాక్ చేసి వాహనంలో తరలిస్తున్నట్టు గుర్తించారు.
గంజాయి తరలింపు సమాచారం తెలుసుకున్న ఎస్ఈబీ అధికారులు కాపు కాశారు. పట్టణ శివారు ప్రాంతం బోయకొండ క్రాస్ వద్ద వీరిని వాహనంతో సహా పట్టుకుని మదనపల్లె ఎక్సైజ్ పోలీస్ స్టేషన్కు తరలించారు. స్వాధీనం చేసుకున్న గంజాయి విలువ 10 లక్షల రూపాయలు ఉండవచ్చని అంచనా వేశారు. ఐదుగురిపై కేసు నమోదు చేసి రిమాండుకు తరలిస్తున్నట్లు సీఐ ఫణీంద్ర వెల్లడించారు.