చిత్తూరు జిల్లా మదనపల్లి నియోజకవర్గం రామసముద్రం మండల ప్రభుత్వ అధికారుల వైఫల్యం రైతుల పాలిట శాపంగా మారింది. మండలంలోని కాప్పల్లె గ్రామంలో రైతులు తమ భూములు అమ్ముకోలేని, వేరొకరి భూమిని కొనుక్కోలేని పరిస్థితి ఏర్పడింది. కాప్పల్లె గ్రామంలో సర్వే నంబర్లను రెవెన్యూ అధికారులు రెండు భాగాలుగా విభజించారు.
ఈ భూములు ఆన్లైన్లో పొందుపరిచేటప్పుడు చేసిన తప్పిదంతో.. రైతులు భూమిని అమ్మాలన్నా.. కొనాలన్నా రిజిస్ట్రేషన్ ఆఫీసులో నమోదు కావడం లేదు. ఈ సమస్య గత నాలుగు సంవత్సరాలుగా ఉందని అధికారులు, రాజకీయ నాయకుల చుట్టూ తిరిగినా సమస్య పరిష్కారం కాలేదని రైతులు వాపోతున్నారు. ప్రభుత్వ అధికారులు తమ పరిధిలో లేదని చెప్పడంతో రైతులు పంచాయతీరాజ్ శాఖ మంత్రి పెద్దిరెడ్డి రామచంద్రారెడ్డిని కలిసి తమ గోడు చెప్పుకున్నారు. రైతుల సమస్యను ప్రభుత్వం దృష్టికి తీసుకెళ్లి పరిష్కరిస్తానని ఆయన హామీ ఇచ్చారు. ఇకనైనా అధికారులు స్పందించి సమస్యను పరిష్కరించాలని రైతులు కోరుతున్నారు.