యువకుడి ఆత్మహత్యాయత్నం.. పోలీసులే కారణమంటూ సెల్ఫీ

ఏ తప్పూ చేయకపోయినా ఓ పోలీస్ అధికారి తనను చిత్రహింసలకు గురిచేస్తున్నాడని ఓ యువకుడు మనస్థాపం చెందాడు. తన బాధను వీడియోలో రికార్డు చేసి ఆత్మహత్యాయత్నం చేశాడు.

చిత్తూరు జిల్లాలో దారుణం చోటుచేసుకుంది. ముంగిలపట్టు గ్రామానికి చెందిన యువకుడు.. పోలీసులు వేధింపులకు గురిచేస్తున్నారని ఆరోపిస్తూ ఆత్మహత్యకు యత్నించాడు. ఏ తప్పు చేయకపోయినప్పటికీ తనను చంద్రగిరి ఎస్సై రామకృష్ణ వేధిస్తున్నాడని రమేశ్ అనే యువకుడు ఈ ఘాతుకానికి పాల్పడ్డాడు. తన ఆవేదనను ఫోన్​లో రికార్డు చేశాడు. గతంలో జరిగిన ఓ వివాదాన్ని మనసులో పెట్టుకుని ఎస్సై తనపై కక్షసాధింపు చర్యలకు పాల్పడుతున్నాడని పేర్కొన్నాడు. పోలీస్​స్టేషన్​లో ఉంచి చిత్రహింసలకు గురిచేశాడని అందుకే ఆత్మహత్య చేసుకుంటున్నానని సెల్ఫీ వీడియో తీసి తన స్నేహితులకు వాట్సాప్​లో పంపాడు. అప్రమత్తమైన స్నేహితులు అతన్ని గుర్తించి హుటాహుటిన తిరుపతిలోని ప్రైవేట్ ఆసుపత్రిలో చేర్చారు. ప్రస్తుతం రమేశ్ పరిస్థితి విషమంగా ఉందని కుటుంబ సభ్యులు వెల్లడించారు.