చంద్రయాన్​లో ఇది ఆరంభం మాత్రమే..

చంద్రయాన్​-2 ప్రయోగం ఉత్సాహం నింపిందని ఇస్రో ఛైర్మన్​ శివన్​ అన్నారు.

చంద్రయాన్​-2 ప్రయోగం కొత్త ఉత్సాహం నింపిందని ఇస్రో ఛైర్మన్‌ శివన్​ తెలిపారు. భారత అంతరిక్ష పరిశోధన రంగంలో చరిత్రాత్మక రోజు అని కొనియాడారు. చంద్రయాన్‌లో ఇది ఆరంభం మాత్రమే అని... మరెన్నో విజయాలు అందుకుంటామని ఆశాభావం వ్యక్తం చేశారు. తీవ్రమైన సాంకేతిక సమస్యలను ఎదుర్కొన్నా... గుర్తించిన వారంలోనే పరిష్కరించామని శివన్​ అన్నారు.

శాస్త్రవేత్తలు అందరూ 24 గంటలూ తదేక దీక్షతో పనిచేశారని...ప్రతిక్షణం అత్యంత కఠినమైన పరీక్షలను ఎదుర్కొన్నామని శివన్​ తెలిపారు. శాస్త్రవేత్తల అంకితభావం, కృషి ఇస్రోకి విజయాన్ని అందించిందన్నారు.

లాంఛ్ వెహికల్ టీమ్‌ అత్యంత సునిశిత పరిజ్ఞానంలో విజయం సాధించింది. చంద్రయాన్​ -2 ప్రయోగాన్ని విజయవంతం చేసేందుకు ప్రతిఒక్కరూ నిష్ఠతో పని చేశారని తెలిపారు.

రాకెట్‌ను విజయవంతంగా నింగిలోకి పంపడంతో... అసలు ప్రయోగం ఇప్పుడు ప్రారంభం అవుతుందన్నారు. వచ్చే 45 రోజులు ఇస్రోకు అత్యంత కీలకమని తెలియజేశారు. సెప్టెంబరు 7 రాత్రి ల్యాండర్‌ చంద్రుడిపై దిగిన తర్వాత యాత్ర పూర్తవుతుందని శివన్​ వెల్లడించారు. ల్యాండర్‌ను చంద్రుడి దక్షిణధ్రువంలో దించి రోవర్‌ను బయటకు తేవాల్సి ఉందని తెలిపారు. ఈ శాస్త్రసాంకేతిక రంగంలో భారత్ పతాకను ఉన్నతంగా ఉంచడమే ఇస్రో లక్ష్యమని వెల్లడించారు.

ఇదీ చదవండి

చంద్రయాన్​-2: విక్రమ్​, ప్రగ్యాన్​లే అసలు హీరోలు!