రేపు ఎడ్​సెట్... ఎల్లుండి ఎంసెట్ ఫలితాలు

విద్యార్థులు ఎప్పుడెప్పుడా అని ఎదురు చూస్తున్న ఎంసెట్ ఫలితాలు ఈ నెల 18న విడుదల కానున్నాయి. శుక్రవారం ఎడ్​సెట్​ ఫలితాలు విడుదల చేసేందుకు యంత్రాంగం సన్నద్ధమైంది.

ఏపీ ఎంసెట్-2019 ఫలితాలను ఈ నెల 18న విడుదల చేయనున్నారు. హైదరాబాద్, ఏపీలో 115 పరీక్ష కేంద్రాల్లో ఇంజినీరింగ్, వ్యవసాయ, వైద్య విద్యలో ప్రవేశాలకు నిర్వహించిన పరీక్షలకు 2,82,901 మంది దరఖాస్తు చేశారు. వీరిలో ఇంజినీరింగ్​కు 1,85,711 మంది, వ్యవసాయ, వైద్య విద్య పరీక్షలకు 81,916 మంది హాజరయ్యారు.
రేపు ఎడ్​సెట్ ఫలితాలు
బీఈడీలో ప్రవేశాలకు నిర్వహించే ఎడ్​సెట్​-2019 ఫలితాలను శుక్రవారం విడుదల చేయనున్నారు. విజయవాడలో ఉన్నత విద్యా మండలి ఛైర్మన్ విజయరాజు ప్రకటించనున్నారు. రాష్ట్ర వ్యాప్తంగా ఎడ్​సెట్​కు 14,019 మంది దరఖాస్తు చేయగా పరీక్షకు 11,650 మంది హాజరయ్యారు.