'ఆర్టీసీ ఉద్యోగులు కాదు... ప్రభుత్వ ఉద్యోగులే'

సమ్మె ఆలోచన విరమించుకున్నట్టు ఆర్టీసీ కార్మిక సంఘాలు ప్రకటించాయి. సమ్మె నోటిసు ఇచ్చిన ఆర్టీసీలోని కార్మిక సంఘాలు సీఎం ఛాంబర్​లో జగన్​ను కలిశాయి. అనంతరం ఈ నిర్ణయాన్ని ప్రకటించాయి. ప్రభుత్వంలో ఆర్టీసీ విలీనం అంశంపై కమిటీ వేసినందుకు జగన్‌కు ధన్యవాదాలు తెలిపాయి. నష్టాలపై ప్రస్తావించిన కార్మికులను జగన్ సముదాయించారు.

ఆర్టీసీ కార్మిక సంఘాల నేతలు ముఖ్యమంత్రి జగన్​తో సమావేశమయ్యారు. సమ్మె నోటిసులోని 26 డిమాండ్లు పరిష్కరించేందుకు యాజమాన్యం లిఖిత పూర్వకంగా నిన్న అంగీకారం తెలియజేసింది. ఈ మేరకు ఆర్టీసీ పరిరక్షణకు ప్రభుత్వ పరంగా చర్యలు తీసుకోవాలని ముఖ్యమంత్రిని కార్మిక సంఘాలు కోరాయి. డిజిల్ ధరల పెంపు వలన ప్రభుత్వానికి భారీగా నష్టాలు వస్తున్నాయని వీటిని ప్రభుత్వమే భరించాలని విజ్ఞప్తి చేశారు. కొత్త బస్సుల కొనుగోలుకు బడ్జెట్​లో నిధులు మంజూరు చేయాలని, ఆర్టీసీ చెల్లిస్తున్న మోటర్ వెహికల్ ట్యాక్స్​ రద్దు చేయాలని నేతలు ముఖ్యమంత్రికి విన్నవించారు. డిమాండ్లపై సీఎం సానుకూల స్పందనతో సమ్మె యోచనకు కార్మికులు విరమణ ప్రకటించారు. ఆర్టీసీ సమస్యలు ఇక ప్రభుత్వ బాధ్యత అని ముఖ్యమంత్రి చెప్పినట్లు కార్మిక సంఘాల నేతలు వెల్లడించారు. మీరంతా ప్రభుత్వ ఉద్యోగులని..అన్నారని తెలిపారు.