వైసీపీలో చిచ్చు రేపిన ఇంఛార్జ్‌‌ల నియామకం - కొనసాగుతున్న రాజీనామాల పరంపర

YSRCP Dissident Factions Fire on New In-Charges: రాష్ట్రంలో ఎన్నికలు సమీపిస్తున్న వేళ అధికార వైసీపీకి కొత్త తలనొప్పులు మొదలయ్యాయి. రాష్ట్ర వ్యాప్తంగా 11 నియోజకవర్గాలకు నూతన ఇంఛార్జిలను నియమించడంపై ఆ పార్టీ అసంతృప్తులు నిరసన గళమెత్తుతున్నారు. గుంటూరు, బాపట్ల జిల్లాల్లో నూతన సమన్వయకర్తలకు వ్యతిరేకంగా పెద్ద ఎత్తున నిరసనలు తెలిపారు. రేపల్లె ఎంపీ మోపిదేవి వెంకటరమణారావుకే నియోజకవర్గ బాధ్యతలు అప్పగించాలని డిమాండ్‌ చేస్తూ తమ పదవులకు రాజీనామాలు చేశారు.

YSRCP Dissident Factions Fire on New In-Charges: ఆంధ్రప్రదేశ్‌లో అధికార వైఎస్సార్ కాంగ్రెస్ పార్టీ అధిష్టానం సార్వత్రిక ఎన్నికల ముందు 11 నియోజకవర్గాలకు కొత్తగా సమన్వయకర్తలను నియమించటంపై, ఆ పార్టీ అసంతృప్తులు ఒక్కసారిగా భగ్గుమన్నారు. నియోజకవర్గాలకు కొత్తగా నియమించిన ఇంఛార్జ్‌లకు వ్యతిరేకంగా నినాదాలు చేస్తూ, పెద్ద ఎత్తున నిరసనలు చేస్తున్నారు. అధిష్ఠానం దిగిరాకుంటే రాష్ట్ర వ్యాప్తంగా పోరాటం తప్పదని హెచ్చరిస్తున్నారు. ప్రజలకు తెలియని కొత్త వ్యక్తులను ఇంఛార్జ్‌‌లుగా నియమించడంపై పార్టీ అధిష్ఠానం పునరాలోచన చేయాలని డిమాండ్ చేస్తున్నారు.

TS Election Effect CM Jagan Changes: తెలంగాణ రాష్ట్రంలో వెలువడిన ఫలితాల కారణంగా సీఎం జగన్ అప్రమత్తమయ్యారు. సిట్టింగ్‌లలో భారీ మార్పులకు తెరతీశారు. మంత్రులు, సిటింగ్‌ ఎమ్మెల్యేలు, పార్టీ సమన్వయకర్తలపై అసంతృప్తి తీవ్రస్థాయిలో ఉన్న నియోజకవర్గాల్లో మార్పులు, చేర్పులు చేస్తూ నిర్ణయం తీసుకున్నారు. ఐ-ప్యాక్‌ చేసిన సర్వేల ఆధారంగా 11 నియోజకవర్గాల్లో సమన్వయకర్తలను మార్చేస్తూ, వారి స్థానాల్లో కొత్త ఇంఛార్జ్‌లను నియమించారు. దీంతో గుంటూరు జిల్లా మంగళగిరి, బాపట్ల జిల్లా రేపల్లె నియోజకవర్గాల్లో వైసీపీ అసంతృప్తి నేతలు నిరసనలకు దిగారు. నూతన ఇంఛార్జ్‌లను తక్షణమే తొలగించాలని డిమాండ్ చేస్తూ, సీఎం జగన్‌కు వ్యతిరేకంగా నినాదాలు చేస్తున్నారు.

Guntur YCP disgruntled Leaders Protest: గుంటూరు జిల్లా మంగళగిరి ఎమ్మెల్యే ఆళ్ల రామకృష్ణారెడ్డి వైసీపీ పార్టీకి, ఎమ్మెల్యే పదవికి రాజీనామ చేయడంతో నియోజకవర్గం ఇంఛార్జ్‌గా గంజి చిరంజీవిని అధిష్ఠానం నియమించింది. దీంతో ఆ పార్టీ అసంతృప్తి కార్యకర్తలు సీఎం జగన్‌పై ఆగ్రహం వ్యక్తం చేశారు. ఎమ్మెల్యే కార్యాలయం వద్ద టైర్లు తగులబెట్టి, నిరస తెలిపారు. అధిష్ఠానానికి వ్యతిరేకంగా నినాదాలు చేశారు. సీఎం జగన్ తీసుకున్న నిర్ణయాన్ని వ్యతిరేకిస్తూ రోడ్డుపై బైఠాయించారు. వచ్చే ఎన్నికల్లో గంజి చిరంజీవికి టిక్కెట్ ఇస్తే ఆయన్ను కచ్చితంగా ఓడిస్తామని హెచ్చరించారు.

Alla Ramakrishna Reddy Resigned from YCP: వైసీపీ అధికారంలోకి వచ్చాక తనకు రెండుసార్లు మంత్రివర్గంలో అవకాశం వస్తుందని మంగళగిరి ఎమ్మెల్యే ఆళ్ల రామకృష్ణారెడ్డి ఎంతో ఆశపడ్డారు. కానీ, ఆయన ఆశ నెరవేరలేదు. ఇప్పుడు టికెట్టూ లేదంటూ మొదటికే మోసం రావడంతో మనస్థాపం చెంది, తాజాగా ఎమ్మెల్యే పదవికి, పార్టీకి రాజీనామా చేశారు. దీంతో జగన్ సొంత మనిషిలాంటి ఆర్కేనే పార్టీకి గుడ్ బై చెప్పడంతో, ఇక పార్టీలో ఇతరుల నిష్క్రమణలకు గేట్లు తెరుచుకున్నట్లేననే ఆ పార్టీ అసంతృప్తుల్లో చర్చ మొదలైంది.

Repalle YCP Leaders Protest on Change of In-charges:నియోజకవర్గ ఇంఛార్జుల మార్పు బాపట్ల జిల్లా రేపల్లె నియోజకవర్గం వైసీపీలో చిచ్చు రేపింది. రేపల్లె నియోజకవర్గ ఇంఛార్జిగా ఈవూరు గణేష్‌ను నియమించడాన్ని, ఎంపీ మోపిదేవి వర్గం తీవ్రంగా వ్యతిరేకించింది. అధిష్ఠానం దిగిరాకుంటే పోరాటం తప్పదని రేపల్లే వైసీపీ అసమ్మతి వర్గం హెచ్చరించింది. రేపల్లె వైసీపీ ఇంఛార్జిగా మోపిదేవి వెంకటరమణను తప్పించి, ఈవూరు గణేష్‌ను అధిష్ఠానం నియమించడం సబబు కాదంటూ నిరసన చేపట్టారు.

Mopidevi Venkataramana Resigns From YCP: మరోవైపు సీఎం జగన్‌ నిర్ణయాన్ని మోపిదేవి వర్గం జీర్ణించుకోలేకపోతోంది. మోపిదేవి వెంకటరమణకు మద్దతుగా మున్సిపల్ ఛైర్ పర్సన్, మార్కెట్ యార్డు డైరెక్టర్లు, జడ్పీటీసీలు, ఎంపీపీలు, ఎంపీటీసీలు, సర్పంచులు రాజీనామా చేశారు. ప్రజలకు తెలియని కొత్త వ్యక్తిని ఇంఛార్జ్‌గా నియమించడంపై పార్టీ అధిష్ఠానం పునరాలోచించాలని డిమాండ్ చేస్తున్నారు. రేపల్లె నియోజకవర్గ బాధ్యతలు మోపిదేవికే అప్పగించాలని, స్థానిక వైసీపీ నేతలు ఆందోళనలు చేస్తున్నారు. సోమవారం రాత్రి రేపల్లె, నిజాంపట్నంలో టైర్లు కాల్చి నిరసన తెలిపారు. ఈవూరు గణేష్ నియామకాన్ని వ్యతిరేకిస్తూ నినాదాలు చేశారు.