Votes Deletion in AP: వైసీపీ సర్కార్ నయా ఆయుధం 'ఫారం-7'... ఆ నియోజకవర్గంలో విచ్చలవిడిగా ఓట్ల తొలగింపు

Votes Deletion in AP: అధికార వైసీపీ వచ్చే ఎన్నికల్లో ఎలాగైనా గెలవాలనే ఆలోచనతో ఏ అవకాశాన్నీ వదలట్లేదు. తెలుగుదేశం, జనసేన మద్దతుదారులన్న అనుమానం వస్తే చాలు.. విచ్చలవిడిగా వారి ఓట్లను తొలగిస్తూ.. ఓటుహక్కును లాక్కుంటోంది. తమ వారి ఓట్లను భారీగా చేరుస్తూ.. ప్రతిపక్షాల ఓట్లను అడ్డదిడ్డంగా తొలగిస్తోంది.

Votes Deletion in AP: బాపట్ల జిల్లా పర్చూరు నియోజకవర్గంలో ఈ సారైనా పాగా వేయాలని వైసీపీ పన్నుతున్న కుట్రలు బట్టబయలవుతున్నాయి. తెలుగుదేశం సానుభూతిపరుల ఓట్లను తొలగించేందుకు అడ్డగోలు ప్రయత్నాలు చేస్తోంది. నియోజకవర్గంలో వేలకొద్దీ దొంగ ఓట్లు ఉన్నాయని ప్రచారం చేసిన వైసీపీ నేతలు.. ఓటర్ల జాబితా సవరణ పేరిట ఆన్‌లైన్‌లో ఫారం-7 దరఖాస్తులు చేశారు. పర్చూరు మండలంలో 14 వేలకు పైగా ఫారం-7 దరఖాస్తులు రాగా, కారంచేడు మండలంలో 2 వేల దరఖాస్తులు వచ్చాయి. అందులో ఒక్క స్వర్ణ గ్రామంలోనే 250 ఓట్లు తొలగించాలని ఫారం-7 దరఖాస్తులు వచ్చాయి.

Opposition Sympathizers Votes Removed in Parchur Constituency: అధికారపార్టీకి చెందిన 124 మంది ఈ కుట్రలో భాగస్వాములయ్యారు. ఒక్కొక్కరు 20 నుంచి 200 మేర ఫాం-7 దరఖాస్తులు చేశారు. అవన్నీ టీడీపీ సానుభూతిపరుల ఓట్లు. స్వర్ణ గ్రామంలో ముత్యాల రామారావు అనే వైసీపీ కార్యకర్త, రేషన్ డిపో డీలర్ దగ్గర తాము నెలనెలా రేషన్ బియ్యం తీసుకుంటున్నామని మరి అతనే.. తన ఓటు తొలగించమని ఎలా దరఖాస్తు చేశాడని స్వర్ణ గ్రామానికి చెందిన సాంబయ్య అనే వ్యక్తి ప్రశ్నించారు.

Votes Deletion in Parchur Constituency: ఎన్నోసార్లు ఓట్లు హక్కు వినియోగించుకున్న వారి ఓట్లు సైతం తొలగింపు దరఖాస్తులు చేశారని.. తాము ఇక్కడే ఉంటున్నా తమ ఓట్లు ఎలా తొలగిస్తారని ఓటర్లు ఆవేదన చెందుతున్నారు. వైసీపీ ఓటమి భయంతోనే.. టీడీపీ, జనసేన సానుభూతిపరుల ఓట్లు తొలగిస్తున్నారని.. దానికి అధికారపార్టీ అండతో అధికారులు నామమాత్రంగా విచారణ చేస్తున్నారని స్వర్ణ గ్రామస్థులు వాపోయారు. ఎన్నికల కమిషన్ జోక్యం చేసుకోవాలని కోరుతున్నారు.

YCP Diversion Politics: టీడీపీకు చెందినవారి ఓట్లు తొలగింపు కోసం అక్రమ దారుల్లో జరుగుతున్న ఈ ప్రయత్నాల గురించి పర్చూరు ఎమ్మెల్యే ఏలూరి సాంబశివరావు కేంద్ర, రాష్ట్ర ఎన్నికల అధికారులకు ఫిర్యాదు చేశారు. ఫారం-7 దరఖాస్తులపై జరుగుతున్న విచారణ కూడా నామమాత్రంగా ఉండటంతో ఎమ్మెల్యే సాంబశివరావు కోర్టును ఆశ్రయించారు. ఎన్నికల కమిషన్ నిబంధనలకు విరుద్ధంగా పర్చూరులో జరుగుతున్న అక్రమాలపై రిట్ పిటిషన్ దాఖలు చేశారు.

TDP Sympathizers Votes Deletion in AP: దీంతో పర్చూరు నియోజకవర్గంలో ఫారం-7 దరఖాస్తులపై రెవెన్యూ అధికారులు విచారణ చేపట్టారు. ప్రస్తుతం ఫారం-7 దరఖాస్తులపై జరుగుతున్న విచారణలో తేలిన అంశాల ఆధారంగా.. పర్చూరు ఎన్నికల అధికారి వెంకటనారాయణ చేసిన ఫిర్యాదు మేరకు 13 మందిపై కేసులు నమోదయ్యాయి. ఇంకా మరికొంతమందిపై కేసులు నమోదుచేయాల్సి ఉంది.