Metro extension to Shamshabad Airport: సాధ్యమైనంత మేర ప్రైవేట్ ఆస్తుల సేకరణను తగ్గించేలా ఎయిర్‌పోర్టు మెట్రో అలైన్మెంట్ ఖరారుచేయాలని భావిస్తున్నట్లు హైదరాబాద్ ఎయిర్‌పోర్టు మెట్రో ఎండీ ఎన్వీఎస్ రెడ్డి వెల్లడించారు. ఎయిర్పోర్ట్ మెట్రో అలైన్మెంట్ను ఇంజినీర్లతో కలిసి ఆయన పరిశీలించారు. నార్సింగి నుంచి రాజేంద్రనగర్‌ గుట్ట వరకు 10 కిలోమీటర్ల మేర అలైన్మెంట్ పరిశీలించారు.
స్టేషన్లను సులువుగా చేరుకోవడానికి ఓఆర్ఆర్ అండర్‌పాస్‌లను ఉపయోగించేందుకు వీలుగా స్టేషన్లు నిర్మించాలని ఎన్వీఎస్ రెడ్డి వెల్లడించారు. భవిష్యత్‌లో అదనపు స్టేషన్ల నిర్మాణం కోసం గుర్తించబడిన ప్రదేశాల్లో మెట్రో వయాడక్ట్‌ ప్లాన్ చేయాలని సూచించారు. స్కైవాక్‌, ఇతర పాదచారుల సౌకర్యాలు స్టేషన్ ప్లానింగ్‌లో అంతర్భాగంగా ఉండాలని సూచించారు. మెట్రో ప్రయాణం మరింత వేగవంతం చేయడానికి, సజావుగా సాగేలా చేయడానికి కొన్ని ప్రదేశాలలో వంపులు లేకుండా సాంకేతిక సాధ్యాసాధ్యాలను పరిశీలించాల‌న్నారు.
మెట్రో పిల్లర్లు నానక్‌రామ్‌గూడ జంక్షన్ నుంచి అప్పా వరకు విస్తరించిన సర్వీస్‌రోడ్డు సెంట్రల్ మీడియన్‌లో ఉండాలని అధికారులకు దిశానిర్దేశం చేశారు. కారిడార్ పరిసరాల్లో నిర్మాణంలో ఉన్న ఎత్తైన వాణిజ్య మరియు నివాస భవనాల నివాసవాసుల అవసరాలను తీర్చడానికి భవిష్యత్తులో అదనపు స్టేషన్ల నిర్మాణం కొరకు కొన్ని గుర్తించబడిన ప్రదేశాలలో ఏర్పాట్లు ఉండాల‌న్నారు.