Farmers problems in bapatla district: పంట ఎప్పుడు పండుతుందో .. ఎప్పుడు పండుతుందో తెలియని పరిస్థితి. ఒక్కోసారి సాగునీరు లేక అన్నదాతలు ఇబ్బందులు పడితే... సాగునీరు కాల్వల రూపంలో పక్కనే ఉన్నా పంటపొలాలకు అందని పరిస్థితి నెలకొంది. గుర్రపుడెక్కలు, తూటి కాడలతో కాల్వలు అస్తవ్యస్థంగా మారడంతో పక్కనే పంటపొలాలు చెమ్మ పట్టి.. చవుడు భూములుగా మారుతున్నాయి. బాపట్ల జిల్లా అప్పికట్ల, భర్తిపూడి రైతులు పడుతున్న పాట్లు అన్నీఇన్నీ కావు.
బాపట్ల జిల్లా అప్పికట్ల, భర్తిపూడి, బాపట్ల ప్రాంతాల్లో మర్రిపూడి డ్రైన్ నిర్వహణను 2016 నుంచి అధికారులు గాలికి వదిలేశారు. గుర్రపుడెక్క, తూటుకాడ, పూడిక పేరుకుపోయాయి. పంట కాల్వలు అధ్వానంగా మారడంతో అన్నదాతలకు కష్టాలు తప్పడం లేదు. ఖరీఫ్, రబీ సీజనల్లో చివరి ఆయుకట్టు వరకు నీరందక రైతులు ఇబ్బందులు పడుతున్నారు. భారీవర్షాల సమయంలో పొలాల్లోనుంచి నీరు త్వరగా వెళ్లకపోవడంతో వరి ఓదెలు నీటిలో మునిగిపోయాయి. గత ఏడాది మే నెలాఖరున పనులకు టెండర్లు పిలిచారు. కాల్వల్లో పనులు జరగకముందే వర్షాలు కురిసి తూతూమంత్రంగా పనులు చేసి చేతులు దులిపేసుకున్నారు. ఈ ఏడాది ముందుగానే 20 కోట్ల రూపాయలతో 180 పనులు చేపట్టడానికి జలవనరుల శాఖ అధికారులు ప్రతిపాదనలు రూపొందించి ప్రభుత్వానికి పంపించారు. అనుమతి లభిస్తే ఏప్రిల్ నెలలో టెండర్లు పిలిచి మే నెలాఖరునాటికి పనులు చేయడానికి ప్రణాళిక రూపొందించారు. ఈసారైనా కాల్వలను బాగు చేసి సాగునీరు అందించాలని వేడుకుంటున్నారు.
' నాకు ఏడు ఎకరాల భూమి ఉంది. నాలుగు సంవత్సరాల నుంచి ఈ కాల్వలలో పూడిక తీయకుండా ఉండటం వల్ల మా పంట పొలాలకు నీరు రాకుండా పోతుంది. మేము నాలుగు సంవత్సరాలుగా అధికారుల చుట్టూ తిరిగినా ప్రయోజనం లేకుండా పోయింది. ఇప్పటికైనా ప్రభుత్వం ఈ మురుగు డ్రైనేజి సమస్యలు పరిష్కరించాలి. 2016లో పూడికలు తీశారు. మళ్లీ ఇప్పటి వరకూ.. కాలువలలో పూడికలు తీయలేదు'-. ఇనుగంటి శ్రీనివాసరావు, రైతు, అప్పికట్ల