కృత్రిమ వేలి ముద్రలతో హాజరు.. వైద్యుడు సస్పెన్షన్​

Doctor Suspended: అతను గుంటుపల్లి పీహెచ్​సీలో వైద్యాధికారి.. కానీ అతను విధులు నిర్వహించేది మాత్రం తన సొంత క్లినిక్​లో.. మరి తాను పని చేస్తున్న ఆస్పత్రిలో హాజరు ఎలా అంటే.. అందుకో ఉపాయం కనిపెట్టాడు. తన వేలి ముద్రలతో కృత్రిమ వేలును తయారుచేసి బయోమెట్రిక్​ ద్వారా హాజరు వేయిస్తున్నాడు. అంతేగాక అతనిపై అనేక ఫిర్యాదులున్నాయి. ఇంకేముంది మంత్రి విడదల రజిని తనిఖీకి వచ్చినప్పుడు గ్రామస్థులు అతనిపై ఫిర్యాదు చేయడంతో సస్పెండ్​ చేశారు.

Doctor Suspended In Bapatla Dist.: టెక్నాలజీని వాడుకుని ప్రతిరోజు హస్పిటల్​లో హాజరవుతున్నట్లు నమ్మించాలని చూశాడు ఓ వైద్యుడు. బయోమెట్రిక్ హాజరు విధానం నుంచే తప్పించుకుని.. హాజరవుతున్నట్లు నమ్మించాలనుకున్నాడు. ఏకంగా అతని వేలిముద్రలతో కృత్రిమ వేలినే తయారు చేయించి హాస్పిటల్​లోని సిబ్బందికి ఇచ్చాడు. వారు రోజు క్రమం తప్పకుండా హాజరు వేసేవారు. ఈ విషయం రాష్ట్ర వైద్య ఆరోగ్య శాఖ మంత్రికి తెలియడంతో అతడిని వెంటనే విధుల నుంచి తొలగించారు.

బాపట్ల జిల్లా గుంటుపల్లి పీహెచ్​సీలో భానుప్రకాశ్‌ విధులు నిర్వహిస్తున్నాడు. పీహెచ్​సీలో విధులకు హాజరు కాకుండా ప్రైవేటు క్లినిక్ నడుపుతున్నాడు. విధులు నిర్వహించే చోట బయోమెట్రిక్ విధానంలో హాజరు నమోదు చేయాల్సి రావటంతో.. కృత్రిమ వేలు సృష్టించాడు. ఆస్పత్రిలోని సిబ్బంది ఆ కృత్రిమ వేలు ద్వారా హాజరు వేయిస్తుండేవాడు. జీతం ఇక్కడ తీసుకుంటూ.. విధులు మాత్రం తన క్లినిక్​లో నిర్వహిస్తుండేవాడు. ఇదంతా గ్రామస్థుల గమనిస్తూ వచ్చారు.

హీహెచ్​సీకి వైద్య ఆరోగ్య శాఖ మంత్రి విడదల రజిని ఆకస్మిక తనిఖీకి వచ్చారు. భానుప్రకాశ్ వ్యవహారమంతా మంత్రికి గ్రామస్థులు వివరించడంతో.. మంత్రి అతనిని విధుల నుంచి తొలగించారు. శాఖాపరమైన చర్యలు తీసుకోవాలని అధికారులను ఆదేశించారు. ఇతను మహిళ సిబ్బందితో అసభ్యంగా ప్రవర్తిస్తున్నాడని,.. హాస్పిటల్​ ప్రాంగణంలోనే మద్యం సేవించేవాడని ఆరోపణలు ఉన్నాయి.

తాజాగా తెలంగాణ రాష్ట్రంలో ఇలాగే చేతిపై వేలిముద్రలు మార్చి.. విదేశాల్లో ఉద్యోగాలకు పంపేందుకు ప్రయత్నిస్తున్న గ్యాంగ్​ను రాచకొండ పోలీసులు చాకచక్యంగా పట్టుకున్నారు. వేలిముద్రల శస్త్రచికిత్సలు చేస్తున్న నలుగురు ముఠా సభ్యులను అరెస్ట్ చేశారు. ప్రధాన నిందితుడు వైఎస్‌ఆర్‌ జిల్లాకు చెందిన నాగమునీశ్వర్‌రెడ్డి అని రాచకొండ సీపీ మహేశ్ భగవత్ పేర్కొన్నారు.

ఇవీ చదవండి: