YSRCP Leaders Sexual Harassment on Women: రెచ్చిపోతున్న వైసీపీ నేతలు.. మహిళలపై లైంగిక దాడులు

YSRCP Leaders Sexual Harassment on Women: మహాభారతంలో ఒకడే కీచకుడు.. కానీ వైసీపీ పాలనలో అడుగుకొకడు తయారవుతున్నాడు. వారిలోనూ అధిక మంది వైసీపీ నేతలే మృగాళ్లుగా మారుతున్నా.. చట్టం తన పని తాను చేయలేకపోతోంది. అధికారాన్ని రాష్ట్ర అభివద్ధికి కన్నా.. మహిళలపై అఘాయిత్యాలు చేయడానికే వైసీపీ నాయకులు విరివిగా వాడుతున్నారు. ఒత్తిళ్లకు తలొగ్గి నిందితులకు అండగా ఉంటూ.. నాల్గో సింహం బాధితులపైనే గాండ్రిస్తోంది.

YSRCP Leaders Sexual Harassment on Women: తప్పు చేసినా అడిగే ధైర్యం ఎవరికీ లేదని భావించినప్పుడు.. తానేం చేసినా అధికారంలో ఉన్నవారు మద్దతిస్తారని అనుకున్నప్పుడు మృగాళ్లు తయారవుతారని.. 2018 మే 5న కృష్ణా జిల్లా పెడన సభలో జగన్‌ ఘనంగా నీతులు వల్లించారు. నాడు చేసిన ఆ వ్యాఖ్యలు ఇప్పుడు రాష్ట్రంలో పరిస్థితులకు సరిగ్గా సరిపోతాయి. కొందరు వైసీపీ నాయకులు.. వారి కుటుంబ సభ్యులు అరాచకాలకు పాల్పడుతున్నారు. ముఖ్యమంత్రి స్థాయిలో కాపాడతారనే ధీమాతో రెచ్చిపోతున్నారు.

అనంతపురం జిల్లా కళ్యాణదుర్గం మండలంలో ఓ దళిత మహిళపై కొందరు వైసీపీ నాయకులు సామూహిక అత్యాచారానికి పాల్పడ్డారు. వీడియో తీసి బెదిరిస్తూ ఏడాదిగా అఘాయిత్యానికి ఒడిగడుతున్నారు. ఆ దృశ్యాలను చూపించి మరో వైసీపీ నాయకుడూ ఆమెను లైంగికంగా వేధిస్తున్నాడు. తనపై అత్యాచార యత్నం చేసిన వ్యక్తిని పోలీసులకు అప్పగించినా అతనిపై కేసు లేకుండా విడిచిపెట్టేశారు. బాధితురాలు స్వయంగా పోలీస్​స్టేషన్‌కు వెళ్లి ఫిర్యాదు చేస్తే.. ఎస్సై సభ్యసమాజం విస్తుపోయేలా ప్రవర్తించారు. అత్యాచారం చిన్న విషయమంటూ తీసిపారేశారు. చివరికి ఎస్పీని ఆశ్రయిస్తే మొక్కుబడిగా ఒకరిపై కేసు నమోదు చేశారు. వైసీపీ నేతల తీరు, పోలీసుల వ్యవహారంపై.. బీజేపీ మహిళా మోర్చా రాష్ట్ర కార్యదర్శి సాధినేని యామినీ శర్మ మండిపడ్డారు.

నంద్యాల జిల్లా అవుకు మండలం అన్నవరం ఎంపీటీసీ సభ్యుడు, వైసీపీ నాయకుడు జి. గోపాల్రెడ్డి ఓ మహిళతో అసభ్యంగా ప్రవర్తించాడు. నిచ్చెనమెట్ల గ్రామానికి చెందిన ఓ మహిళ నిద్రిస్తున్న సమయంలో ఒంటిపై దుస్తుల్లేకుండా ఆమె ఇంట్లోకి చొరబడి అఘాయిత్యానికి యత్నించాడు. బాధితురాలు గట్టిగా కేకలు వేయటంతో అక్కడి నుంచి జారుకున్నాడు. గోపాలరెడ్డి ఉమ్మడి కర్నూలు జిల్లా వైసీపీ ఎంపీటీసీ సభ్యుల సంఘానికి అధ్యక్షుడే కాక, అధికార పార్టీలో కీలక నాయకుడు కావటంతో పోలీసులు తొలుత కేసు నమోదు చేయలేదు. వ్యవహారం చర్చనీయాంశం కావడంతో నామమాత్రపు సెక్షన్లతో కేసు పెట్టి మమా అనిపించారు.

కోనసీమ జిల్లా కాట్రేనికోన మండలం చిర్రాయానంలో వైసీపీ మద్దతుదారైన గ్రామ సర్పంచి మంగాదేవి కుమారుడు తేజతో పాటు మరో నలుగురు యువకులు ఓ బాలికపై సామూహిక అత్యాచారానికి పాల్పడ్డారు. అధికార బలంతో బాధితురాలి కుటుంబాన్ని బెదిరించి పోలీసులకు ఫిర్యాదు చేయకుండా అడ్డుకున్నారు. నెల్లూరు జిల్లాకు చెందిన వైసీపీ నేత కొండూరు అనిల్‌బాబు.. దళితురాలైన తన కుమార్తెపై అత్యాచారానికి పాల్పడ్డారని, విషయం ఎవరికైనా చెబితే చంపేస్తానంటూ బెదిరిస్తున్నారని బాధితురాలి తండ్రి ఇటీవల ఎస్సీ కమిషన్‌కు ఫిర్యాదు చేశారు.

తన కోరిక తీర్చలేదనే కక్షతో ఓ పేద వితంతు మహిళ ఇంటిని అనకాపల్లి జిల్లా కొత్త ఎల్లవరానికి చెందిన వైసీపీ నాయకుడు కన్నూరి సత్తిబాబు, ఆయన స్నేహితులు కూల్చేశారు. నెల్లూరు జిల్లా ఇందుకూరుపేట మండలం ముదివర్తపాలేనికి చెందిన ఓ పాస్టర్ గిరిజన మహిళపై అత్యాచారానికి పాల్పడ్డాడు. బాధితురాలు పోలీసులకు ఫిర్యాదు చేయగా.. పాస్టర్ వైసీపీ కీలక నేతను ఆశ్రయించారు. దీంతో ఫిర్యాదు ఉపసంహరించుకోవాలంటూ అతను బాధితురాలి కుటుంబాన్ని బెదిరించారు. వైసీపీ నేతల అభినవ కీచకులుగా మారరని.. హైకోర్టు న్యాయవాది రజిని ఆగ్రహం వ్యక్తం చేశారు.