"జర్నలిస్టుపై దాడి అత్యంత హేయమైన చర్య"

రాయదుర్గంలో ఓ జర్నలిస్టుపై జరిగిన దాడిని మాజీ మంత్రి, తెదేపా నేత కాల్వ శ్రీనివాసులు ఖండించారు. అధికారి పార్టీకి చెందిన నాయకులే ఈ దాడికి పాల్పడ్డారని ఆయన ఆరోపించారు.

వైకాపా ప్రభుత్వం అధికారంలోకి వచ్చిన మూడు నెలల వ్యవధిలోనే జర్నలిస్టులపై దాడులు పెరిగాయని మాజీ మంత్రి కాల్వ శ్రీనివాసులు అన్నారు. అనంతపురం జిల్లా రాయదుర్గంలో ఓ న్యూస్ ఛానల్​ విలేఖరి మనోహర్​పై కొంతమంది గుర్తు తెలియని వ్యక్తులు దాడి చేశారు. ఈ దాడిని ఖండిస్తూ కాల్వ శ్రీనివాసులు అనంతపురంలోని ఓ ఆస్పత్రిలో చికిత్స పొందుతున్న విలేఖరిని పరామర్శించారు. వైకాపా అధికారంలోకి వచ్చినప్పటి నుంచి ప్రజలకు భద్రత కరువైందన్నారు. కక్ష సాధింపు చర్యలతో ప్రజలు, జర్నలిస్టులపైన దాడులు చేస్తున్నారని విమర్శించారు.

రాయదుర్గం ఘటనపై ఎమ్మెల్యే కాపు రామచంద్రారెడ్డి ఏం సమాధానం చెబుతారని కాల్వ శ్రీనివాసులు ప్రశ్నించారు. ఎమ్మెల్యే అనుచరులే ఈ దాడికి పాల్పడ్డారని ఆరోపించారు. ఘటనపై జిల్లా యంత్రాంగం, పోలీసు అధికారులు చర్యలు తీసుకోకపోవటంపై కాల్వ శ్రీనివాసులు అసహనం వ్యక్తం చేశారు.