సుబ్బయ్య హత్యపై పలు జిల్లాల్లో తెదేపా నేతల నిరసన

ప్రొద్దుటూరులో హత్యకు గురైన తెదేపా నేత సుబ్బయ్య కుటుంబానికి న్యాయం చేయాలని కోరుతూ పలు జిల్లాల్లో ఆ పార్టీ నేతలు నిరసన చేపట్టారు. వైకాపా పాలనలో దాడులు పెరిగాయని ఆరోపించారు. అధికార ప్రభుత్వం కక్ష్య సాధింపు చర్యలకు పాల్పడుతోందని మండిపడ్డారు.

తెదేపా నేత సుబ్బయ్య హత్యకు ప్రభుత్వం బాధ్యత వహించాలని అనంతపురంలో అంబేద్కర్ విగ్రహం వద్ద ఆ పార్టీ శ్రేణులు నిరసన చేపట్టారు. సర్కారుకు వ్యతిరేకంగా నినాదాలు చేశారు. వైకాపా అధికారంలోకి వచ్చినప్పటి నుంచి ఎస్సీ, ఎస్టీ, మైనారిటీ, బీసీలపై దాడులు పెరిగాయని ఆరోపించారు. త్వరలో ప్రజలు ప్రభుత్వానికి బుద్ధి చెబుతారని హెచ్చరించారు. దోపిడీ రాజ్యానికి ప్రజలు స్వస్తి పలకాల్సిన అవసరముందని పిలుపునిచ్చారు. ప్రజలకు తెదేపా అండగా ఉంటుందని చెప్పారు.

గుంటూరు జిల్లా:

హత్యకు గురైన తెదేపా నేత నందం సుబ్బయ్య కుటుంబానికి న్యాయం చేయాలంటూ.. పార్టీ నేతలు నిరసన ప్రదర్శనలు నిర్వహించారు. గుంటూరు పశ్చిమ నియోజవర్గంలోని అంబేద్కర్ విగ్రహం వద్ద ఆందోళన చేశారు. రాష్ట్రంలో ముఖ్యమంత్రి.. హత్యా రాజకీయాలను ప్రోత్సహిస్తున్నారన్నారని నియోజకవర్గం తెదేపా సమన్వయకర్త కోవెలమూడి రవీంద్ర అన్నారు. వైకాపా అధికారంలోకి వచ్చాక బీసీలపై దాడులు, హత్యలు పెరిగిపోయాయని ఆరోపించారు. పరిపాలన విషయంలో హైకోర్టు సంచలన వ్యాఖ్యలు చేయడం సిగ్గుచేటు అని అన్నారు. ఇకనైనా కక్ష్య సాధింపు చర్యలు మానుకోవాలని హెచ్చరించారు.

తెదేపా నేత సుబ్బయ్య కుటుంబానికి న్యాయం చేయాలంటూ.. జిల్లాలోని హిమాని సెంటర్​ గాంధీ విగ్రహం వద్ద నల్ల జెండాలు పట్టుకుని ప్రభుత్వానికి వ్యతిరేకంగా నినాదాలు చేశారు. ఫ్యాక్షన్ రాజకీయాలను సీఎం జగన్ పెంచి పోషిస్తున్నారని తెదేపా జాతీయ అధికార ప్రతినిధి నసిర్ అహమ్మద్ అన్నారు. సుబ్బయ్యని హత్య చేస్తే పార్టీ నేతలు భయపడరని.. మరింత ధైర్యంగా పోరాడతామన్నారు. హత్యకు కారణమైన వారిని తక్షణమే శిక్షించాలని డిమాండ్ చేశారు.

తూర్పుగోదావరి జిల్లా :

రాష్ట్రంలో అరాచక పాలన కొనసాగుంతోందని ప్రత్తిపాడు నియోజకవర్గం తెదేపా ఇన్​ఛార్జ్ వరుపుల రాజా అన్నారు. హత్యకు గురైన సుబ్బయ్య కుటుంబానికి న్యాయం చేయాలని శంఖవరం మండలం నెల్లిపూడి గ్రామంలో నిరసన చేశారు. సుబ్బయ్య కుటుంబానికి చంద్రబాబు రూ.34 లక్షల ఆర్థిక సహాయం ప్రకటించారని తెలిపారు. పాలక ప్రభుత్వం చేస్తున్న అవినీతిని ప్రశ్నించకుండా... ప్రతిపక్షాలు, న్యాయస్థానాల గొంతు నొక్కేస్తున్నారని మండిపడ్డారు. ఈ కార్యక్రమంలో యనమల కృష్ణుడు, కొమ్ముల కన్నబాబు, బద్ది రామారావు పాల్గొన్నారు.

చిత్తూరు జిల్లా:

తెదేపా నేత సుబ్బయ్యపై దాడి చేసి కిరాతకంగా చంపటం హేయమైన చర్య అని తిరుపతి పార్లమెంట్​ తెదేపా అధ్యక్షుడు నరసింహ యాదవ్ అన్నారు. బీసీలపై జరుగుతున్న దాడులకు నిరసన తెలుపుతూ.. ప్రభుత్వానికి వ్యతిరేకంగా నినాదాలు చేశారు. నగరంలోని బాలాజీ కాలనీ కూడలి వద్ద నున్న జ్యోతిరావు పూలే విగ్రహానికి వినతి పత్రం సమర్పించారు. హత్య చేసిన వారిని వెంటనే అరెస్ట్​ చేయాలని డిమాండ్​ చేశారు.

ఇదీ చదవండి:సుబ్బయ్య హత్య కేసు : పోలీసుల అదుపులో ఐదుగురు