కర్ణాటక నుంచి గుట్కా అక్రమ రవాణా

అనంతపురంలోని రాష్ట్ర సరిహద్దు చెక్ పోస్ట్​ల్లో పోలీసులు తనిఖీలు నిర్వహించారు. కర్ణాటక రాష్ట్రానికి చెందిన ఐచర్ వాహనంలో ఎలాంటి ఆధారాలు లేని 25 లక్షల విలువ చేసే పొగాకు ఉత్పత్తులు పట్టుబడ్డాయి. వాహనంతోపాటు అందులో ఉన్న ముగ్గురు వ్యక్తులను పోలీసులు అదుపులోకి తీసుకున్నారు.

అనంతపురం చెక్ పోస్ట్​లో ఎస్ఐ. రాజేష్, పోలీసుల బృందం తనిఖీలు నిర్వహించారు. కర్ణాటక రాష్ట్రానికి చెందిన ఐచర్ వాహనంలో ఉల్లిగడ్డలు సంచుల కింద 2400 కేజీల బరువుతో 80 బస్తాల్లో పొగాకును అక్రమ రవాణా చేస్తున్న వాహనాన్ని పోలీసులు పట్టుకున్నారు. దీని విలువ మార్కెట్​లో 24 లక్షల 96 వేల రూపాయలు ఉంటుందని అధికారులు తెలిపారు. వాహనంలో ఉన్న ముగ్గురు వ్యక్తులను విచారించగా పలు అంశాలు వెలుగు చూసినట్లు పేర్కొన్నారు.

వీరు కర్ణాటక రాష్ట్రంలోని తుంకూరు ప్రాంతం నుంచి ఆంధ్రప్రదేశ్ మీదుగా హైదరాబాద్​కు పొగాకు ఉత్పత్తులు తీసుకెళ్తున్నారు. గతంలో కూడా ఐచర్ వాహనంపై హైదరాబాద్​లో కేసు నమోదై ఉన్నట్లు తెలియజేశారు. తుంకూర్ ప్రాంతంలో పోగాకు ఉత్పత్తిదారుడైన గుప్తాజి, హైదరాబాద్ సిటీలో ఉన్న డీలర్ దిలీప్, మధ్యప్రదేశ్ ఇండోర్ సిటీలో ఉన్న డీలర్ అజయ్​లను విచారించాల్సి ఉందని డీఎస్పీ పేర్కొన్నారు.