పీసీసీ చీఫ్ పదవికి రఘువీరా రాజీనామా

పీసీసీ చీఫ్ రఘువీరా రెడ్డి.. రాజీనామా చేశారు. మరో ఆర్నెల్ల కంటే ఎక్కువగా.. పార్టీకి సమయం కేటాయించలేనని చెప్పారు. రాజీనామాను ఆమోదించాలంటూ.. పార్టీ జాతీయ ప్రధాన కార్యదర్శి ఊమెన్ చాందీకి లేఖ రాశారు.

raghuveera resignation letter

రాష్ట్ర కాంగ్రెస్ అధ్యక్ష పదవికి రఘువీరారెడ్డి రాజీనామా చేశారు. పార్టీ జాతీయ ప్రధాన కార్యదర్శి ఊమెన్ చాందీకి.. రాజీనామా లేఖను పంపించారు. 2014 మార్చి 11న తనకు ఆంధ్రప్రదేశ్ కాంగ్రెస్ బాధ్యతలు అప్పజెప్పారని గుర్తు చేసుకున్న రఘువీరా.. అవకాశం ఇచ్చిన సోనియాగాంధీ, రాహుల్ గాంధీకి కృతజ్ఞతలు తెలిపారు. శక్తివంచన లేకుండా పార్టీ కోసం శ్రమించానని చెప్పారు. ఇతర నాయకుల్లో ఒకరికి అవకాశం ఇవ్వాలన్న ఆలోచనతోనే రాజీనామా నిర్ణయం తీసుకున్నట్టు వివరించారు. ఈ ఏడాది మే 19నే.. నాటి పార్టీ అధ్యక్షుడు రాహుల్ గాంధీకి రాజీనామా లేఖ పంపించానని చెప్పారు. ఇకపై పార్టీ కార్యకలాపాల్లో చురుగ్గా పాల్గొనలేనని.. మరో ఆర్నెల్ల కంటే పార్టీకి సమయం కేటాయించలేనని స్పష్టం చేశారు. తన కుటుంబానికి సంబంధించిన బాధ్యతలు పూర్తి చేయాల్సిన అవసరం ఉందన్నారు. తన రాజీనామాను ఆమోదించాల్సిందిగా పార్టీ నాయకత్వాన్ని కోరారు.