ఆస్తికి అడ్డుగా ఉన్నాడన్న ఆలోచనతో.. బావనే హతమార్చాలని మరదలు కుట్ర పన్నింది. బయటి వ్యక్తులకు డబ్బులిచ్చి హత్యాయత్నం చేయించింది. ఈ సంఘటన అనంతపురం జిల్లా నల్లచెరువు మండలం పోలేవాండ్లపల్లిలో కలకలం సృష్టించింది. ఈనెల 5న జగన్‌మోహన్‌రెడ్డి అనే వ్యక్తిపై జరిగిన హత్యాయత్నం కేసును నల్లచెరువు పోలీసులు ఛేదించారు. ఈ కేసులో నిందితులను కదిరికి సమీపంలోని కౌలేపల్లి రైల్వే గేటు వద్ద అరెస్టు చేశారు. సోమవారం నల్లచెరువులో ఏర్పాటు చేసిన సమావేశంలో కదిరి గ్రామీణ సీఐ మధు.. ఈ హత్యా యత్నం ఘటనకు సంబంధించిన వివరాలను వెల్లడించారు.
కదిరి పట్టణానికి చెందిన భాగ్యలక్ష్మికి నల్లచెరువు మండలం పోలేవాండ్లపల్లికి చెందిన రంజిత్‌ కుమార్‌ రెడ్డితో వివాహమైంది. తనకున్న చెడు అలవాట్లకు బావ జగన్‌ మోహన్‌ రెడ్డి అడ్డుగా ఉన్నాడని భావించింది. అతడిని చంపితే ఆస్తి అంతా తనకే దక్కుతుందని కుట్ర పన్నింది. కదిరి పట్టణానికి చెందిన జిలాన్‌, అతిక్, డేవిడ్‌లకు 1.50 లక్షల రూపాయలు ఇచ్చి బావను చంపించేలా పథకం రచించింది.