రాష్ట్రవ్యాప్తంగా ఉత్కంఠ రేపిన తాడిపత్రి మున్సిపల్ ఛైర్మన్‌ ఎన్నిక ప్రశాంతంగా ముగిసింది. పురపాలక ఛైర్మన్‌గా మాజీ ఎమ్మెల్యే జేసీ ప్రభాకర్‌రెడ్డి ఎన్నికయ్యారు. గురువారం ఉదయం తాడిపత్రిలోని మున్సిపల్ సమావేశ మందిరంలో ఛైర్మన్‌, వైస్‌ ఛైర్‌పర్సన్ల ఎన్నిక నిర్వహించారు. వైకాపా తరఫున 2వ వార్డు నుంచి గెలుపొందిన ఫయాజ్‌ బాషా, తెదేపా నుంచి 24వ వార్డు కౌన్సిలర్‌ జేసీ ప్రభాకర్‌రెడ్డి ఛైర్మన్‌ పదవికి పోటీపడ్డారు. ఓటింగ్‌ నిర్వహించగా.. ఫయాజ్‌ బాషాకు ఎక్స్‌అఫీషియో సభ్యులు (ఎంపీ తలారి రంగయ్య, ఎమ్మెల్యే పెద్దారెడ్డి) మద్దతు కలిపి 18 ఓట్లు వచ్చాయి. జేసీ ప్రభాకర్‌రెడ్డికి సీపీఐ, స్వతంత్ర అభ్యర్థులు మద్దతు తెలపడంతో 20 ఓట్లు వచ్చాయి. దీంతో మున్సిపల్ ఛైర్మన్‌గా ప్రభాకర్‌రెడ్డి ఎన్నికైనట్లు ప్రిసైడింగ్‌ అధికారి జి.ఆర్‌.మధుసూదన్‌ ప్రకటించారు. వైస్‌ ఛైర్‌పర్సన్‌ పదవికి వైకాపా నుంచి పి.రూప, తెదేపా నుంచి పి.సరస్వతి పోటీపడగా రెండు ఓట్ల తేడాతో సరస్వతి ఎన్నికయ్యారు. జేసీ ప్రభాకర్‌రెడ్డి 1987-1992, 2000-2005 మధ్య కాలంలో మున్సిపల్ ఛైర్మన్‌గా పని చేశారు. తాజాగా మూడోసారి ఛైర్మన్‌గా ఎన్నికయ్యారు.
అభివృద్ధికి కలిసి పనిచేస్తా: జేసీ ప్రభాకర్‌రెడ్డి
‘తాడిపత్రి మున్సిపాలిటీ అభివృద్ధి కోసం ఎమ్మెల్యే పెద్దారెడ్డి, ఎంపీ తలారి రంగయ్యతో కలిసి పని చేస్తా. అవసరమైతే నిధుల కోసం సీఎం జగన్‌ను కలుస్తా. మా మధ్య వైరుధ్యం ఉండొచ్చు కానీ ఆయన రాష్ట్రానికి సీఎం. ఈ విషయంలో జగన్‌ సహకరిస్తారని నమ్ముతున్నా. మున్సిపల్ ఎన్నిక ప్రశాంతంగా జరగడంలో ఆయన సహకారం ఉంది. లేదంటే ఇప్పుడున్న పరిస్థితుల్లో నేను అంత సులభంగా ఛైర్మన్‌గా ఎన్నికయ్యేవాణ్ని కాదు.’- జేసీ ప్రభాకర్‌రెడ్డి