ఐపీఎల్ క్రికెట్ బెట్టింగ్ ముఠా అరెస్టు

ఐపీఎల్ క్రికెట్ బెట్టింగ్​కు పాల్పడుతున్న 22 మందిని అనంతపురం జిల్లా సోమందేపల్లి పోలీసులు అరెస్టు చేశారు. వారి వద్ద నుంచి నగదు, సెల్​ఫోన్లను స్వాధీనం చేసుకున్నారు.

అనంతపురం జిల్లా సోమందేపల్లి మండల కేంద్రంలో క్రికెట్ బెట్టింగ్​కు పాల్పడుతున్న 22 మందిని పోలీసులు అరెస్టు చేశారు. వారి వద్ద నుంచి 62,500 రూపాయల నగదు, 21 సెల్​ఫోన్లను స్వాధీనం చేసుకున్నారు. సోమందేపల్లి పోలీసు స్టేషన్​లో గురువారం ఏర్పాటు చేసిన మీడియా సమావేశంలో డీఎస్పీ మహబూబ్ బాషా కేసు వివరాలను వెల్లడించారు.

ఐపీఎల్ సీజన్ కొనసాగుతున్నందున క్రికెట్ బెట్టింగ్​లు జరగకుండా ప్రత్యేక నిఘా ఉంచామని వెల్లడించారు. ఇందులో భాగంగానే 22 మందిని అరెస్టు చేసినట్లు వెల్లడించారు. బెట్టింగ్​లకు పాల్పడితే కఠిన చర్యలు తీసుకుంటామన్న డీఎస్పీ... డబ్బుల కోసం యువత అడ్డదారి తొక్కవద్దని హెచ్చరించారు.