అనంతపురం జిల్లాలో తెదేపా నేత నారా లోకేష్ సుడిగాలి పర్యటనతో నాలుగు నియోజకవర్గాల రైతుల సమస్యలు తెలుసుకున్నారు. జిల్లాలో గుంతకల్లు, తాడిపత్రి, శింగనమల, రాప్తాడు నియోజకవర్గాల్లో సాయంత్రం ఆరు గంటల వరకు విరామం లేకుండా పర్యటించి అన్నదాతల ఆవేదన వింటూ..,నష్టపోయిన పంటలను పరిశీలించారు. పెద్దవడుగూరు మండలంలో కుళ్లిన పత్తి, వేరుసెనగ పంటలను పరిశీలించి రైతుల సమస్యలు తెలుసుకున్నారు. అనంతపురం గ్రామీణం కామారుపల్లిలో రైతు శివయ్య కు చెందిన వేరుశనగ పంటను పరిశీలించి పెట్టుబడి వివరాలను తెలుసుకున్నారు. తన పుస్తెలు విక్రయించి పంటకు పెట్టుబడి పెట్టినట్లు శివయ్య భార్య లోకేశ్ ఎదుట కన్నీటి పర్యంతమయ్యారు. సీఎం జగన్ రాయలసీమ వ్యక్తి అయివుండి..,ఇక్కడి రైతులు తీవ్రంగా నష్టపోయినా కన్నెత్తి చూడటంలేదని ఆయన విమర్శించారు.
ప్రభుత్వం అధికారంలోకి వచ్చిన 17 నెలల కాలంలో రైతులకు డ్రిప్ రాయితీ లేకుండా చేశారని, వ్యవసాయ రుణాల్లో కోతలు పెట్టారని లోకేశ్ ధ్వజమెత్తారు. ఎన్నికల ముందు ఓట్ల కోసం ఊళ్లు తిరిగిన జగన్...,నష్టపోయిన రైతులను చూడటానికి ఎందుకు రాలేదని ప్రశ్నించారు. జిల్లా రైతులు 2 వేల కోట్ల పంటల పెట్టుబడిని నష్టపోగా.., కేవలం 39 కోట్లే నష్టంగా అంచనా వేయటం అన్నదాతలను అవమానించినట్లేనన్నారు. తమ ప్రభుత్వ హయంలో రైతులకు 90 శాతం రాయితీతో డ్రిప్ పరికరాలు అందజేశామన్నారు. బోర్లకు విద్యుత్ మోటర్లు బిగిస్తే జిల్లా నుంచే రైతు ఉద్యమం ప్రారంభిస్తామని సీఎం జగన్ను హెచ్చరించారు.