దానిమ్మ రైతుల్లో ఆనందం.. పెరిగిన ధరలతో అనూహ్య లాభం

అనంతపురం జిల్లాలో ఎకరం పొలంలో దానిమ్మ పంటను సాగుచేసిన రైతు సైతం లాభాలు చవిచూశారు. మహారాష్ట్ర, కర్ణాటక రాష్ట్రాల్లో అకాల వర్షాలు, అనుకూలించని వాతావరణం ఎదురై దానిమ్మ పూత, పిందె రాలిపోవటంతో అనంత రైతుల పంట పండింది. జిల్లాలో కూడా కుండపోత వానలు ఇబ్బంది పెట్టినా.. దిగుబడి కాస్త తగ్గింది కానీ పంట పూర్తిగా దెబ్బతినలేదు. దేశంలో దిగుబడి లేకపోవటం దానిమ్మ రైతులకు కలిసొచ్చిన అంశం. దీనికి తోడు కరోనా వైరస్‌ విజృంభణ నేపథ్యంలో పండ్ల వినియోగం పెరగటంతో అన్ని రాష్ట్రాల్లో ధరలు రికార్డుస్థాయిలో ఉన్నాయి.

దానిమ్మ పంట రైతుల మోముల్లో దరహాసం పండించింది. అనంతపురం జిల్లాలో ఎకరం పొలంలో సాగుచేసిన రైతు సైతం లాభాలు చవిచూశారు. మహారాష్ట్ర, కర్ణాటక రాష్ట్రాల్లో అకాల వర్షాలు, అనుకూలించని వాతావరణం ఎదురై దానిమ్మ పూత, పిందె రాలిపోవటంతో అనంత రైతుల పంట పండింది. జిల్లాలో కూడా కుండపోత వానలు ఇబ్బంది పెట్టినా.. దిగుబడి కాస్త తగ్గింది కానీ పంట పూర్తిగా దెబ్బతినలేదు. దేశంలో దిగుబడి లేకపోవటం దానిమ్మ రైతులకు కలిసొచ్చిన అంశం.

ఇందుకు తోడు కరోనా వైరస్‌ విజృంభణ నేపథ్యంలో పండ్ల వినియోగం పెరగటంతో అన్ని రాష్ట్రాల్లో ధరలు రికార్డుస్థాయిలో ఉన్నాయి. జిల్లాలో ఎక్కువ మంది రైతులు సెప్టెంబర్‌లో పంట దిగుబడి తీసుకునేలా తోటలు సాగుచేస్తున్నారు. ఆ సీజన్‌లో పంట కోతకు ప్రణాళిక చేస్తే పలు రకాల తెగుళ్ల నుంచి పండ్లను కాపాడుకోవచ్చనేది ఇక్కడి రైతులకు అనుభవ పాఠం. పెట్టుబడికి తగిన ధరలు రావటంతో దానిమ్మ రైతుల కష్టానికి ఫలితం దక్కింది.

అక్కడి నష్టమే.. మనకు లాభం

దానిమ్మ సాగులో మహారాష్ట్ర దేశంలో అగ్రస్థానంలో ఉంది. నిరంతర వర్షాల కారణంగా షోలాపూర్, ఔరంగాబాద్, నాసిక్‌ తదితర ప్రాంతాల్లో పంట పూర్తిగా దెబ్బతింది. కర్ణాటక రాష్ట్రం సాగులో రెండో స్థానంలో ఉండగా.. అక్కడా ఇదే పరిస్థితి నెలకొంది. ఏటా సెప్టెంబర్‌లో పంట తీసుకునేలా ఆ రెండు రాష్ట్రాల రైతులు తోటలు నిర్వహిస్తారు. ఈ సారి ఆగస్టు, సెప్టెంబరులో కురిసిన భారీ వర్షాలు ఈ పంటను బాగా దెబ్బతీశాయి. నల్లమచ్చ తెగులు, బ్యాక్టీరియా విజృంభించటంతో పూత, పిందె పూర్తిగా రాలిపోయింది.

ఉత్తరాది సూపర్‌ మార్కెట్లకు, విదేశాలకు ఎగుమితి చేసే మహారాష్ట్ర రైతులు నష్టపోయారు, వ్యాపారులకు రాబడి పోయింది. అక్కడ దిగుబడి లేకపోవటం, కర్ణాటకలో కూడా ఇలాంటి పరిస్థితే తలెత్తటంతో వ్యాపారులంతా తమిళనాడు, ఆంధ్రప్రదేశ్‌లో వాలిపోయారు. ఈ రెండు రాష్ట్రాల్లో కూడా వాతావరణం, అకాల వర్షాల ప్రభావం ఉన్నా.. రైతులు పంటను కంటికి రెప్పలా చూసుకోవటంతో 50 శాతం పంట దిగుబడి దక్కింది.

పోటెత్తిన కర్ణాటక వ్యాపారులు

ఏటా రైతులకు కనిష్ఠ ధరలిస్తూ రూ.కోట్ల వ్యాపారం చేస్తున్న కర్ణాటక బడా వ్యాపారులంతా.. అనంతపురం జిల్లాకు పోటెత్తారు. కర్ణాటక రాష్ట్రంలో కొనుగోలు చేసిన దానిమ్మను బెంగళూరు, మైసూరు తదితర ప్రధాన నగరాల్లోని సూపర్‌ మార్కెట్లకు తరలించే వ్యాపారులకు ఈ సారి ఆ రాష్ట్రంలో నాణ్యమైన ఉత్పత్తి లభించటంలేదు. దీంతో అనంతపురం జిల్లాకు వచ్చి అధిక ధరలిస్తామని రైతుల చుట్టూ తిరుగుతున్నారు. ముందుగానే గొలుసుకట్టు సూపర్‌ మార్కెట్లతో ఒప్పందం చేసుకున్న వ్యాపారులు సరకు ఇవ్వలేకపోతే, ఆయా సంస్థలు మరో వ్యాపారిని ఆశ్రయిస్తాయని ధర పెంచుతున్నారు.

గతంలో ఇదీ పరిస్థితి..

గతంలో దానిమ్మ పండించిన రైతులు టన్నుకు రూ.60వేల నుంచి రూ.80 వేలు పొందటమే కనాకష్టంగా ఉండేది. దీనికోసం అన్నదాతలు పలు సందర్భాల్లో వ్యాపారులకు ఫోన్లు చేసి పంట కొనుగోలు చేయాలని ప్రాధేయపడేవారు. ప్రస్తుతం పరిస్థితి తారుమారై వ్యాపారుల మధ్య పోటీ పెరిగి ధరను పెంచేయటంతో రైతులకు మేలు జరిగింది. గతంలో ఎన్నడూ లేనంతగా ఈ సారి గరిష్ఠంగా రైతులు టన్నుకు రూ.1.75 లక్షలు తీసుకుంటున్నారు. హెక్టారు సాగుచేసిన రైతు కూడా ఈ సారి పెట్టుబడి పోగా రూ.3లక్షల నుంచి రూ.6 లక్షలు పొందారు. ఇక్కడ కొనుగోలు చేసిన వ్యాపారులు నాణ్యత బాగా ఉన్న దానిమ్మను బెంగళూరు, మైసూర్, చెన్నైలోని సూపర్‌ మార్కెట్లకు, రెండో రకాన్ని మహారాష్ట్ర, దిల్లీ, విజయవాడ మార్కెట్లకు పంపుతున్నారు.

కష్టం నుంచి గట్టెక్కా..

నేను చాలా చిన్న రైతును. మూడేళ్ల కిందట 1.75 ఎకరాల్లో 750 దానిమ్మ చెట్లు నాటా. గత ఏడాది 11 టన్నుల దిగుబడి రాగా, ధర పెద్దగా రాలేదు. తోట నాటాక రెండోసారి పంట మంచి ధర పలకటంతో కష్టాలు తీరాయి. తొలి కోతకు 16 టన్నుల దిగుబడి రాగా టన్ను రూ.98 వేలకు అమ్మాను, రూ.15.40 లక్షలు వచ్చింది. రెండు రోజుల కిందట రెండో కోతలో ఒకటిన్నర టన్ను రాగా, టన్ను రూ.1.20 లక్షలకు విక్రయించా. మరో కోత వారం రోజుల్లో ఉంది. ఒకటిన్నర టన్ను వస్తుంది అది కూడా రూ.లక్ష పైనే కొంటామని వ్యాపారి చెప్పారు. చెట్లు నాటినప్పటి నుంచి మూడేళ్ల పెట్టుబడంతా పోగా, బాగా మిగులుబాటైంది. - ఎం.గంగాధర, కమ్మూరు, కూడేరు మండలం

ఈ ధరలు ఇంకో నెల కొనసాగుతాయి

దేశవ్యాప్తంగా దానిమ్మ సాగుచేసే రాష్ట్రాల్లో పంట పూర్తిగా దెబ్బతింది, ఎక్కడా సరకు అందుబాటులో లేదు. ప్రస్తుతం నాణ్యమైన దానిమ్మకు టన్నుకు రూ.1.75 లక్షలు వస్తోంది. ఇది మరో నెల రోజుల వరకు కొనసాగే అవకాశం ఉంది. కరోనా వైరస్‌ కారణంగా దానిమ్మ వినియోగం బాగా పెరిగింది. కర్ణాటకలోని హసన్‌ జిల్లా నుంచి ఎక్కువ మంది వ్యాపారులు ఇక్కడి పంటను కొనుగోలు చేస్తున్నారు. జిల్లాలో దానిమ్మ సాగుచేసిన రైతులంతా ఆనందంగా ఉన్నారు.- చంద్రశేఖర్, ఉద్యానశాఖ సహాయ సంచాలకుడు

ఇదీ చదవండి: