అనంతపురం జిల్లా ధర్మవరంలో వైకాపా ఎమ్మెల్యే కేతిరెడ్డి వెంకట్రామిరెడ్డి అరాచకాలు అధికమయ్యాయని.. మాజీ ఎమ్మెల్యే సూర్యనారాయణ ఆరోపించారు. ప్రభుత్వ ఆస్పత్రిలో చికిత్స పొందుతున్న భాజపా కార్యకర్త నరేంద్రను ఆయన పరామర్శించారు. న్యాయవాదిని పోలీసులతో పిలిపించి అతడి మీద దాడి చేశారంటూ ఎమ్మెల్యేపై ఆగ్రహం వ్యక్తం చేశారు. కేతిరెడ్డి అవినీతి, అక్రమాలకు అడ్డూ అదుపు లేకుండాపోయిందని విమర్శించారు. పోలీసులూ ఆయనకు వత్తాసు పలుకుతున్నారని మండిపడ్డారు.
పోలీస్ వ్యవస్థపై నమ్మకం లేదని మాజీ ఎమ్మెల్యే తెలిపారు. కోర్టును ఆశ్రయించి మొదటి ముద్దాయిగా వెంకట్రామిరెడ్డి, రెండో ముద్దాయిగా సీఐ కర్ణాకర్పై కేసు నమోదు చేయిస్తామన్నారు. దౌర్జన్యాలు, అక్రమాలకు పాల్పడుతూ.. ఆ రక్తపు మరకలతోనే ఎమ్మెల్యే రూ. 200 కోట్ల మేర అవినీతికి పాల్పడ్డారని ఆరోపించారు. ప్రజలు త్వరలోనే తగిన బుద్ధి చెబుతారని హెచ్చరించారు.