పోలీస్​స్టేషన్​లో కానిస్టేబుల్ దొంగతనం!

దొంగలకు బుద్ధి నేర్పాల్సిన ఓ కానిస్టేబుల్ అడ్డదారి తొక్కాడు. తాను విధులు నిర్వహిస్తున్న స్టేషన్​లోని వస్తువులను దొంగతనం చేసి ఇంట్లో పెట్టుకున్నాడు. చివరికి సంకెళ్లను సైతం వదలిపెట్టలేదు. ఈ ఘటన అనంతపురం జిల్లాలో జరిగింది. అంతేకాకుండా సైకోలా మారి భార్యను చిత్రహింసలకు గురిచేసేవాడని పోలీసులు తెలిపారు.

అతను చేసేది కానిస్టేబుల్ ఉద్యోగం... ప్రవృత్తి మాత్రం దొంగతనం. వినడానికి ఆశ్చర్యంగా ఉన్నా ఇది నిజం. అధికారుల కళ్లు గప్పి ... తాను విధులు నిర్వహిస్తున్న పోలీస్ స్టేషన్​లోనే వస్తువులను దొంగిలించాడు.

అనంతపురం జిల్లా గుత్తి రైల్వే స్టేషన్​లో జీఆర్​పీ కానిస్టేబుల్​గా విధులు నిర్వర్తిస్తున్నాడు మంజునాథ్. ఆదోనిలో తన కుటుంబంతోపాటు నివసించేవాడు. సైకోగా మారిన మంజునాథ్... స్టేషన్ నుంచి ఎత్తుకెళ్లిన సంకెళ్లను తన భార్యకు వేసి ఇంట్లో చిత్రహింసలు పెట్టేవాడు. అతని ప్రవర్తనతో విసుగు చెందిన బాధితురాలు.... భర్త మీద ఆదోనిలోని పోలీస్ స్టేషన్లో ఫిర్యాదు చేసింది. కేసు నమోదు చేసిన పోలీసులు.. పరారీలో ఉన్న మంజునాథ్ ఇంట్లో బుధవారం తనిఖీ చేశారు. అక్కడి వస్తువులను చూసి ఖంగుతిన్నారు.

12 ప్రధాన శాఖలకు చెందిన నకిలీ సీల్​తో పాటు గుత్తి పోలీస్ స్టేషన్​లో దస్త్రాలు, స్టేషన్​కి చెందిన కొన్ని వస్తువులు, సంకెళ్లను దొంగతనం చేసి ఇంట్లో పెట్టుకున్నాడు. అక్రమంగా ఇంట్లో ప్రభుత్వ శాఖలకు చెందిన విలువైన వస్తువులు దాచినందుకు గాను సెక్షన్ 379, 409, 406 కింద అతనిపై కేసు నమోదు చేశారు జీఆర్​పీ అధికారులు.

గతంలో ప్రేమ వివాహం చేసుకుని (ముస్లింగా)మత మార్పిడి చేసుకున్న మంజునాథ్... ఈ విషయాన్ని అధికారులకు తెలపకుండా విధులు నిర్వహించాడు. ఈ వ్యవహారంపై ఉన్నతాధికారులకు తెలిపి... మంజునాథ్​పై తగిన చర్యలు తీసుకుంటామని పోలీసు అధికారులు తెలిపారు.