యువతి కిడ్నాప్ కథ సుఖాంతం.. కానిస్టేబులే ప్రధాన నిందితుడు

అనంతపురంలో యువతి కిడ్నాప్‌ వ్యవహారం సుఖాంతమైంది. ఓ కానిస్టేబుల్‌ తన మిత్రుల సహకారంతో బాధితురాలిని అపహరించాడని పోలీసులు గుర్తించారు. అతనితో సహా నలుగురిని పోలీసులు అరెస్టు చేశారు. ఆమెను సురక్షితంగా రక్షించారు.

అనంతపురంలో యువతి కిడ్నాప్ కేసును 30 గంటల్లోనే పోలీసులు ఛేదించారు. ఈ కేసులో మొత్తం నలుగురిపై కేసు నమోదు చేశామని... వీరికి సహకరించిన మరో 18 మందిపై చర్యలు తీసుకోనున్నట్లు పోలీసులు తెలిపారు. కేసు వివరాలను జిల్లా ఎస్పీ సత్య ఏసుబాబు బుధవారం మీడియా సమావేశంలో వెల్లడించారు. ఈ నెల రెండో తేదీ సాయంత్రం అనంతపురానికి చెందిన ఓ యువతి కిడ్నాప్​నకు గురైంది. కర్నూలు జిల్లాలోని అవుకు పోలీస్ స్టేషన్​లో విధులు నిర్వహిస్తున్న కానిస్టేబుల్ భగీరథ తన మిత్రుల సహాయంతో యువతిని అపహరించాడు. బాధితురాలికి నిందితుడితో గతంలో నిశ్చితార్థం అయ్యింది. అయితే అతని ప్రవర్తన నచ్చక పెళ్లికి నిరాకరించారు యువతి కుటుంబ సభ్యులు. ఈ క్రమంలో యువతిని ఎలాగైనా దక్కించుకోవాలన్న దుర్బుద్ధితో భగీరథ ఈ కిడ్నాప్​నకు పాల్పడ్డాడు.

పట్టించిన సెల్​ఫోన్

బాధితురాలి తల్లిదండ్రుల ఫిర్యాదుతో రంగంలోకి దిగిన పోలీసులకు.. తాడిపత్రి సమీపంలో ఓ సెల్​ఫోన్ దొరికింది. దాని సహాయంతో నిందితులు తిరుపతి వైపు వెళ్తున్నట్లు సమాచారం రావటంతో బనగానపల్లి సమీపంలో కారులో వెళ్తున్న కిడ్నాపర్లను పోలీసులు పట్టుకున్నారు. ఈ కేసులో ప్రధాన నిందితుడు అయిన కానిస్టేబుల్ భగీరథతో సహా నలుగురిని అదుపులోకి తీసుకున్నామని... ఈ కిడ్నాప్​నకు సహకరించిన మరో 18 మందిని అరెస్టు చేయడానికి చర్యలు తీసుకుంటున్నామని ఎస్పీ ఏసుబాబు తెలిపారు. మూడు వాహనాలను స్వాధీనం చేసుకున్నట్లు పేర్కొన్నారు.

ఇదీ చదవండి