'మా పాప చనిపోయింది... వైద్యుల నిర్లక్ష్యమే కారణం..!'

ప్రసవం కోసం ఆసుపత్రిలో చేరిన మహిళ పండంటి పాపాయికి జన్మనిచ్చింది. తల్లీబిడ్డ నాలుగు రోజుల పాటు ఆరోగ్యంగా ఉన్నారు. ఇంతలో ఏమైందో తెలియదు పాప చనిపోయింది. పచ్చకామెర్లతో మృతి చెందిందని వైద్యులు చెప్పగా.. అలా ఎలా ఉన్నట్లుండి చనిపోతుందంటూ బాధిత తల్లిదండ్రులు ఆసుపత్రి ముందు ఆందోళనకు దిగారు. అనంతపురం ప్రభుత్వాసుపత్రిలో జరిగిన ఘటన వివరాలివి.

అనంతపురం ప్రభుత్వ ఆసుపత్రిలో శిశువు మృతిపై బంధువులు ఆందోళన చేపట్టారు. పట్టణంలోని రాణినగర్​కు చెందిన విజయలక్ష్మి అనే మహిళ ప్రసవం కోసం 26వ తేదీన ఆసుపత్రిలో చేరింది. అదే రోజు పాపకు జన్మనిచ్చింది. ఆరోజు నుంచి తల్లీ బిడ్డ ఆరోగ్యంగా ఉన్నారు. అయితే బుధవారం మధ్యాహ్నం 12 గంటల సమయంలో శిశువు కదల్లేదు. వెంటనే వైద్యులకు చెప్పగా.. పరీక్షలు చేసి పచ్చకామెర్ల వ్యాధితో మృతి చెందినట్లు నిర్ధరించారు. నాలుగు రోజులు బాగానే ఉన్న పాప ఎలా చనిపోయిందంటూ శిశువు తల్లిదండ్రులు వాదనకు దిగారు. వైద్యుల నిర్లక్ష్యంతోనే మృతి చెందిందంటూ ప్రసూతి విభాగం ఎదుట నిరసన చేపట్టారు. వీరికి సీపీఐ నాయకులు మద్దతు తెలిపారు. సమాచారం అందుకున్న పోలీసులు అక్కడకు చేరుకుని నచ్చజెప్పగా ఆందోళన విరమించారు. బాధిత తల్లిదండ్రుల నుంచి లిఖిత పూర్వక ఫిర్యాదు తీసుకుని విచారణ చేస్తామని హామీ ఇచ్చారు.

ఇవీ చదవండి: