AP Weaving Sector in YSRCP Government మాటల్లోనే మగ్గానికి మహర్దశ..! 3.5 లక్షల చేనేతల్లో సాయం దక్కింది 80 వేల మందికే..!

YCP Government Restrictions in Nethanna Nestham: మగ్గానికి మహర్దశ తీసుకొచ్చాం.. చేనేతలకు చరిత్రలో ఎవరూ చేయనంత సాయం చేశాం.. నేతన్నల జీవితాల్లో కొత్త వెలుగులు తీసుకొచ్చాం.. ఇవీ జగన్‌ ప్రభుత్వం చెప్పుకుంటున్న గొప్పలు. సాయం కోరే లబ్ధిదారులు లక్షల్లో ఉంటే.. అరకొరగానే నేతన్న నేస్తం అందిస్తూ సీఎం జగన్ డాంబికాలు పోతున్నారు. మగ్గం ఉన్నవారికి సాయమంటూ.. కార్మికులను విస్మరిస్తున్నారు.

AP weaving labour in YSRCP Government: వెనకబడిన వర్గాలను ఉద్దరించడంలో దేశంలోనే మనల్ని కొట్టేవాడు లేడంటూ సీఎం జగన్​ మాటలు చెబుతారు. అయితే.. అవన్నీ నిజాలే అనుకుంటున్నారా..? బలహీన వర్గాలను ఆయన చేయిపట్టుకుని ముందుకు నడిపిస్తున్నారని భ్రమపడుతున్నారా..? అయితే జగన్‌ కనికట్టు తెలియాలంటే.. చేనేత కార్మికులను వైసీపీ ప్రభుత్వం ఏవిధంగా మోసం చేస్తుందో ఒకసారి తెలుసుకోవాల్సిందే..

అనంతపురం జిల్లా ధర్మవరం పట్టువస్త్రాలకు ప్రసిద్ధి. అక్కడ 33వేల మంది చేనేత వృత్తిపైనే ఆధారపడి జీవిస్తుంటారు. నేతన్న నేస్తం ద్వారా ప్రభుత్వం చేనేత కార్మికులకు సాయం చేస్తోందని సీఎం జగన్ గొప్పగా చెప్పుకుంటున్నారు. అయితే ఈ ఏడాది జులై 21న సీఎం జగన్ విడుదల చేసిన నేతన్న నేస్తం సాయం కేవలం 10వేల మందికి మాత్రమే అందింది. మిగిలిన 23 వేల మంది పరిస్థితి ఏంటంటే.. ప్రభుత్వం వివిధ రకాల నిబంధనలు, ఆంక్షలతో సాయానికి నోచుకోలేదు. వీరిలో 15 వేల మందికి సొంత మగ్గాలు లేవని.. వేరొకరి వద్ద కూలికి మగ్గాలు నేస్తున్నారని సాయం అందించమన్నారు. మిగిలిన 8వేల మంది చేనేత ఉప వృత్తులు చేసుకుంటున్నారని అసలు లెక్కలోకే తీసుకోలేదు. ఇది ఇప్పుడు కొత్తేమీ కాదు. గత ఐదు విడతల సాయంలోనూ జగన్ ప్రభుత్వం ఇదే పంథా అనుసరించింది.

AP Weavers Problems: ఇది కేవలం ఒక్క ధర్మవరానికే పరిమితం కాదు.. రాష్ట్రంలో చేనేత కార్మికులు ఉన్న ప్రతిచోట ఇలాంటి పరిస్థితే ఉంది. చేనేత, అనుబంధ రంగాల వారు రాష్ట్రవ్యాప్తంగా దాదాపు మూడున్నర లక్షల మంది ఉండగా.. ఇటీవల నేతన్న నేస్తం అందించింది మాత్రం కేవలం 80వేల మందికి మాత్రమే. అదేమని ప్రశ్నిస్తే.. తాము ఎన్నికల మేనిఫెస్టోలో మగ్గం ఉన్నవారికే ప్రోత్సాహం ఇస్తామని చెప్పామంటున్నారు. అంటే మగ్గం లేకుండా ఇతరుల వద్ద కూలికి నేత పనిచేసే వారు చేనేత కార్మికులు కారా..? వారికి సాయం అందించాల్సిన బాధ్యత ప్రభుత్వానికి లేదా..? తాము పేదల పక్షపాతమని పదేపదే చెప్పుకుంటున్న జగన్‌కు.. కూలికి నేత పనిచేసే కార్మికులు పేదలుగా కనిపించడం లేదా..? రోజువారీ వేతనం కింద పనిచేస్తూ చేనేతకు అనుబంధంగా ఉప వృత్తులు చేసుకునేవారు ధనవంతులని అనుకుంటున్నారా.? నాలుగేళ్లుగా సాయం కోసం వారు గగ్గోలు పెడుతున్నా.. అవి సీఎం జగన్‌ చెవికెక్కడం లేదు. సాయం అవసరం ఉన్నవారికి చేయకుండానే మగ్గానికి మహర్దశ తెచ్చాం అంటూ..పూలే, అంబేడ్కర్‌ వంటి మహనీయులు పేర్లు చెప్పి డాంబికాలు పలకడమెందుకని నేతన్నలు ఆగ్రహం వ్యక్తం చేస్తున్నారు.

Handloom Workers Problems in AP: తిమ్మిని బమ్మిని చేయడంలో జగన్‌ను మించిన వారు లేరు. అసలైన పేదలను పట్టించుకోకుండానే చేనేత కార్మికులకు చరిత్రలో తనకు మించి సాయం చేసిన వారు లేరంటూ గొప్పలు చెప్పడంలో దిట్ట. 100 మగ్గాలు ఉన్న మాస్టర్ వీవర్‌కు ఆర్థిక సాయం చేస్తూ.. ఆ మగ్గాల వద్ద కూలీలుగా పనిచేస్తున్న వారికి నేతన్న నేస్తం వర్తింపజేయకపోవడం ఏంటో అంతుచిక్కని వ్యవహారమే. 50 ఇళ్లకు ఒక వాలంటీర్‌ను నియమించి సమస్త సమాచారం రాబడుతున్న ప్రభుత్వం..మాస్టర్‌ వీవర్స్ వద్ద ఎంతమంది కూలికి పనిచేస్తున్నారు..? వారు నిజంగా ఇదే వృత్తిలో ఉన్నారా.? అన్నది పెద్ద కష్టమా చెప్పండి. నేత పనుల్లో అల్లుపోయడం, రంగులు అద్దడం, వార్పింగ్‌, జరీపోయడం, వైండింగ్‌, అచ్చు అతకడం, కండెలు చుట్టడం, డిజైనింగ్ పనులు అనుబంధ రంగాల వారు చేస్తారు. నిజంగా చేనేత రంగాన్ని ప్రభుత్వం ఆదుకోవాలంటే ఈ రంగంపై ఆధారపడి ఎంతమంది ఉన్నారో లెక్క తేల్చడం ప్రభుత్వానికి పెద్ద విషయం కాదు.

మంగళగిరిలో 2వేల 500మంది చేనేత కార్మికులు ఉండగా.. వీరిలో సొంత మగ్గాలు ఉన్న 488 మందికి మాత్రమే నేతన్న నేస్తం సాయం అందింది. మాస్టర్‌ వీవర్స్‌ వద్ద షెడ్డుల్లో పనిచేస్తున్నవారికి, సొసైటీల్లో నేసే 700 మందికి, ఇళ్ల వద్ద అద్దె మగ్గాలపై నేసే వారికి నేతన్న నేస్తం అందలేదు. అంతేకాకుండా ఇక్కడ ఉప వృత్తులపై ఆధారపడి దాదాపు 5 వేల మంది జీవనం సాగిస్తున్నారు. ఎమ్మిగనూరులో గద్వాల్‌ పట్టు చీరలు నేసే కార్మికులు 8వేల 200 మంది ఉంటే.. నేతన్న నేస్తం అందింది కేవలం 1800 మందికి మాత్రమే. మిగిలిన 6వేల 400 మంది మాస్టర్‌ వీవర్స్ వద్ద కూలికి నేసే వారే. ఇక్కడ అనుబంధ రంగాల్లో పనిచేస్తున్న వారు 8వేల మందికి పైగానే ఉన్నారు. మదనపల్లెలో 2వేల 900 మందికి సాయం అందించగా.. అద్దె మగ్గాలపై నేసే 1500 మందికి ప్రభుత్వం మొండిచేయి చూపింది. వెంకటగిరిలో 17 వందల మందికి సాయం అందగా.. అద్దె మగ్గంపై నేసేవారు, అనుబంధ రంగాలకు చెందిన మరో 400 మంది ఉన్నారు. అదే విధంగా ఉప్పాడ, కొత్తపల్లె పరిధిలో 670 మందికి సాయం అందగా.. మరో వందమంది అనుబంధ రంగాల కింద పనిచేస్తున్నారు.